Aumenta un 75% a presenza de desfibriladores en espazos públicos de Galicia

|

Desfibriladorsemiautomaticoreanimacioncardiopulmonar


Galicia aumentou nun 75 por cento a presenza de Desfibriladores Semiautomáticos (DESA) en lugares públicos en 2016, de acordo cos datos do Sergas destacados pola empresa B+Safe. Dos 627 equipos presentes na Comunidade galega en 2015 pasouse a 1.095 en 2016, "un incremento que repercute positivamente na saúde cardíaca de miles de persoas", segundo destaca nun comunicado B+Safe, empresa especialista en cardioprotección.


Esta cifra supón que existe unha dispoñibilidade de un DESA por cada 2.465 habitantes, unha media que eleva os rexistros de anos anteriores. O director xeral de B+Safe, Nuño Azcona, valora "de maneira moi positiva" o incremento da presenza en Galicia o pasado ano dunha tecnoloxía de saúde pública "capaz de salvar vidas". Así mesmo, mostrouse optimista respecto da súa evolución durante 2017.


Respecto diso, lembrou que a Consellería de Sanidade da Xunta anunciou un decreto que entrará en vigor ao longo deste ano. "A normativa contemplará a recomendación de instalar DESA en lugares que rexistren gran afluencia de persoas: colexios con máis de 1.000 alumnos, centros deportivos con máis de 100 usuarios, aeroportos, portos e estacións de pasaxeiros e centros comerciais", comentou.


"Este paso adiante incrementará a dispoñibilidade de espazos cardioprotegidos en Galicia, aínda que o decreto non sexa de obrigado cumprimento, senón que deixará a decisión en mans de cada institución, sexa pública ou privada. Espero que a seguinte etapa sexa facer obrigatoria a instalación en máis espazos", segundo explicou Azcona.


Na actualidade, a lexislación española --Real Decreto 365/2009, do 20 de marzo--, limítase a recomendar a instalación de DESA en espazos concorridos.


Con todo, a empresa B+Safe destacou que son cinco as comunidades autónomas que desenvolveron normativas propias que establecen onde e cando debe haber desfibriladores de maneira obrigatoria: Andalucía, Canarias, Euskadi, Cataluña e Asturias. Doutra banda, outras, como Madrid, anunciaron que pronto regularán a súa normativa en cardioprotección.


USO XERAL


Outro aspecto que a empresa destaca do decreto anunciado pola Xunta en materia de cardioprotección é que permitirá que calquera persoa poida utilizar desfibriladores "en casos excepcionais" tras recibir autorización da central de emerxencias no teléfono 061.


"Esta clase de desfibriladores poden ser manexados con éxito por persoas sen coñecementos sanitarios, que poden axudar a salvar vidas se actúan a tempo", comentou o director xeral de B+Safe.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress