Os acusados de agresión sexual en Lalín declaran que a relación foi consentida

A Audiencia de Pontevedra acolleu este martes a primeira sesión do xuízo por unha suposta agresión sexual múltiple a unha moza no municipio de Lalín na que, presuntamente, participarían catro persoas.

No banco da Sección Segunda da Audiencia Provincial de Pontevedra sentáronse só dous dos acusados, xa que os outros son menores de idade.

A moza compareceu ante o tribunal a porta pechada mentres que a declaración dos acusados tivo lugar en audiencia pública. Ambos afirmaron ser inocentes e declararon que a relación foi consentida e que a moza en ningún momento se negou.

Os dous procesados explicaron no xuízo na Audiencia que xa coñecían á moza con anterioridade e definírona como "problemática".

PENAS

O fiscal solicita doce anos de prisión para un dos acusados por un delito de violación e outros cinco anos para o outro procesado por un delito de agresión sexual.

Ademais da pena de prisión, a Fiscalía pide que os dous acusados indemnicen á moza con 7.000 euros polos danos psicolóxicos que lle causou este feito, que tivo lugar durante unha festa celebrada en Lalín en novembro de 2012.

ESCRITO DE ACUSACIÓN

Segundo o escrito de acusación da Fiscalía, catro persoas rodearon á súa vítima e, a pesar da resistencia da moza, manosearon as súas partes íntimas por encima da roupa en repetidas ocasións.

Tras este primeiro episodio, segundo o Ministerio Fiscal, un dos acusados levou á moza pola forza ata a parte traseira do palco da festa de Lalín, rompeulle as medias e penetrouna cos dedos mentres a bicaba.

Os dous menores, segundo relata o escrito de acusación, axudáronlle na violación ao agarrar á vítima para que non puidese escapar.

O xuízo retomarase este xoves coas declaracións de máis testemuñas.