Ollo ao uso de lentes de contacto cosméticas este entroido

O Colexio de Ópticos-Optometristas de Galicia advirte dos perigos que pode carrexar un uso inadecuado das lentes de contacto cosméticas ou de fantasía que moitas persoas lucirán neste Entroido como complemento dos seus disfraces. Advirten desde este colectivo que as lentes cosméticas, do mesmo xeito que o resto de lentes de contacto, están colocadas directamente sobre a córnea do ollo e "requiren unha adaptación previa na que se valorará o estado do ollo e a bágoa para determinar se a adaptación é posible".

"Máis do 90% dos problemas coas lentes de contacto é debido ao seu mal uso, na manipulación e deixamento no mantemento, ademais da prolongación no porte" destaca o presidente do Colexio, Eduardo Eiroa.

Levar unha lente defectuosa, utilizar unha que estea caducada ou prolongar o seu uso, non ser hixiénicos na súa utilización, usar líquidos en mal estado ou inadecuados ou intercambialas con outros usuarios pode provocar "danos graves no ollo", advirten.

"Unha lente de contacto inadecuada para un ollo, que se manipule incorrectamente ou que non se coide da maneira indicada polo fabricante, pode provocar, a longo prazo, "conxuntivite, queratite ou erosións epiteliales", sinala Eiroa.

COMPLEMENTOS QUE LIMITAN A VISIÓN

Outros perigos para a visión en Entroido poden chegar da man dos accesorios dos disfraces para os ollos, como algunhas perrucas, caretas e antefaces que incorporan elementos decorativos, que segundo os ópticos-optometristas, "poden limitar a visión e provocar tropezóns ou caídas". Outros complementos do disfrace relacionados coa visión, como lupas, anteollos, catalexos ou prismáticos, poden entrar en contacto cos ollos, polo que "hai que ler atentamente as súas instrucións", sobre todo, destacan, cando se trata de menores.

As LENTES DE CONTACTO, SEMPRE ANTES DE MAQUILLARSE E DESMAQUILLARSE

Outro elemento de risco para os nosos ollos, segundo as advertencias dos ópticos, é a maquillaxe de entroido. Os usuarios de lentes de contacto, as persoas con sequedade nos ollos ou os nenos "deben ter especial coidado no uso de produtos de cosmética e sempre deben poñer as lentes de contacto antes da maquillaxe" para evitar que poidan entrar restos e, de igual forma, quitar as lentes de contacto "antes de desmaquillarse".

Os ópticos-optometristas galegos sinalan que a maquillaxe debe estar homologada e ser de calidade para non irritar os ollos no seu contacto ou cando se fai a limpeza facial, do mesmo xeito que as pestanas postizas, e alertan dos riscos de comprar estes produtos en "mercadillos ou bazares".