O Eurogrupo validará o borrador de Orzamentos sen pedir máis recortes

Os ministros de Economía e Finanzas da zona euro (Eurogrupo) darán luz verde este xoves, salvo sorpresa, ao borrador de Orzamentos remitido por España e non reclamarán recortes adicionais, en liña coa opinión da Comisión Europea que deu o visto e prace a semana pasada ao documento.

Os responsables da carteira económica dos socios do euro abordarán as opinións do Executivo comunitario dos borradores orzamentarios tanto de España como de Lituania, unha vez que ambos os países enviaron máis tarde do estipulado os seus documentos por senllos procesos electorais.

Un alto funcionario do Eurogrupo apuntou que non espera un debate "problemático" sobre esta cuestión e asegurou que "non se pedirán medidas adicionais" ao Goberno de Mariano Rajoy para cumprir co déficit, a pesar de que Bruxelas estima que España pechará este ano cun desvío do 3,3%, dúas décimas por encima do obxectivo. Isto sucedería unicamente "se fose necesario".

Ademais, a mesma fonte indicou que non hai no seo do Eurogrupo "sinais de preocupación" polo feito de que o Goberno español non aprobase aínda o orzamento definitivo de 2017 pola falta de consenso entre as formacións políticas.

Segundo a análise que publicou a Comisión Europea o pasado martes, o plan orzamentario español cumpre "en liñas xerais" cos obxectivos marcados baixo o Pacto de Estabilidade e Crecemento. Bruxelas calcula que España incumprirá por "unha estreita marxe" o obxectivo do 3,1% pactado para este ano, polo que insta as autoridades españolas a estar "preparadas" para adoptar novos axustes.

O ministro de Economía, Industria e Competitividade, Luis De Guindos, explicará aos seus homólogos o plan orzamentario que enviou a Bruxelas a principios de novembro e no que o Executivo incluíu medidas para elevar a recadación en 7.500 millóns.

RESCATE DE GRECIA

Os ministros de Economía da zona euro tamén abordarán o estado da segunda revisión do rescate de Grecia, cuxas negociacións están estancadas polas discrepancias entre as autoridades helenas, as institucións acredoras (Comisión Europea, MEDE e BCE) e o FMI.

Fontes comunitarias explicaron que seguen existindo diferenzas tanto nas reformas do mercado laboral e do sector enerxético como na senda fiscal que se esixirá a Atenas unha vez finalice o rescate, a mediados de 2018. Con todo, este alto funcionario afirmou que a carta enviada ás institucións polo ministro de Finanzas grego, Euclides Tsakalotos, é "un bo punto de partida".

Á súa vez, confiou en que as institucións logren un acordo que permita a volta á capital grega dos equipos técnicos, para pechar a segunda revisión do programa en febreiro.