Bruxelas estuda as acusacións de elusión fiscal de Inditex

A Comisión Europea asegurou este martes que está a examinar o informe dos Verdes na Eurocámara no que acusaban o grupo téxtil español Inditex de eludir o pago na UE de 585 millóns a través de enxeñería fiscal antes de decidir se abre unha investigación formal ou non.

"A Comisión toma nota da información que está dispoñible ao público e estaa revisando como fixo con outras fontes de información", explicou nunha rolda de prensa o portavoz en materia de Competencia do Executivo comunitario, Ricardo Cardoso.

Preguntado polo contido da entrevista que a comisaria de Competencia, Margrethe Vestager, concedeu ao medio 'Te Interesa', Cardoso engadiu que Bruxelas decidirá se toma accións concretas ou non o fai baseándose nas conclusións que extraia desta revisión.

O grupo ecoloxista no Parlamento Europeo fixo público en decembro un informe no que acusa a Inditex de eludir o pago de 585 millóns de euros en impostos entre 2011 e 2014 grazas ao deseño dunha enxeñería fiscal "agresiva".

En concreto, a investigación dos Verdes estima que o desvío do pago de regalías a Países Baixos polo grupo téxtil custoulle a España 218 millóns en ingresos fiscais non recadados, 25 millóns a Alemaña, 57 millóns a Italia, 76 millóns a Francia e 20 millóns a Grecia, entre outros países europeos.