Galicia vence a Asturias nunha batalla lingüística ao rexeitar o Estado a cooficialidade do topónimo Ría do Eo para a Ría de Ribadeo

Dragado no porto de Ribadeo nunha foto de arquivo

O Ministerio de Transportes, Movilidade e Axenda Urbana inadmite por agora a cooficialidade dos topónimos 'ría de Ribadeo' e 'ría do Eo', de maneira que se impón a primeira sobre a segunda, proposta polo Principado de Asturias e avalada polo Instituto Xeográfico Nacional (IGN).

"No día de hoxe (este venres), na Deputación de Lugo recibimos unha resolución da Subsecretaría de Transportes na que se avalan as alegacións que presentamos contra a resolución do pasado mes de outubro que ditou a Dirección Xeral do Instituto Xeográfico Nacional", confirmou a portavoz socialista do goberno provincial, Pilar García Porto.

Así, a Subsecretaría anula a resolución do IGN que fixaba a cooficialidade e, ao mesmo tempo, ordena "retrotraer as actuacións ao momento previo á solicitude dun informe" á comisión especializada de nomes xeográficos, que terá que emitir un ditame con "motivación suficiente".

"Isto significa que se avala a postura e os argumentos que expuxemos no seu día na Deputación de Lugo, no recurso de alzada que presentamos", recalcou a portavoz do goberno provincial.

E é que, "fronte á exhaustiva motivación formulada desde esta institución, avalada por un informe de técnicos" da Universidade de Santiago de Compostela (USC), o Ministerio considera que a resolución do Instituto Xeográfico Nacional "non estaba motivada en tanto que se baseou nun informe da comisión especializada de nomes xeográficos".