Plan de choque 'Obesidade Zero' do SERGAS porque o 13% é obeso e case o 40% ten sobrepeso

As arcas públicas sofren moito por algo a miúdo evitable, pois obesidade e sobrepreso axudan a que aparezan moitas enfermidades crónicas como a diabetes, por exemplo.

O consumo de bolería industrial é un dos motores do aumento de peso

A Consellería de Sanidade traballa na implantación do 'Plan Obesidade Zero' co fin de previr o sobrepeso e a obesidade na cidadanía da Comunidade galega.

Así o informou Sanidade nun comunicado, no que explica que a Dirección Xeral de Saúde Pública elaborou un borrados para previr o sobrepeso e a obesidade dos galegos denominado 'Plan Obesidade Zero'.

O documento tivo en conta a evidencia científica dispoñible, as intervencións que mostraron a súa eficacia, as recomendacións dos organismos científicos nacionais e internacionais e a realidade da sociedade galega, matizou Sanidade.

PROCESO DE AVALIACIÓN
Unha vez elaborado o borrador, Sanidade vai proceder a realizar un proceso de avaliación por persoas expertas na materia e polas entidades e departamentos implicados na execución do plan.

Para iso, concretou o departamento sanitario, deseñouse un proceso participativo estruturado en catro mesas: a política, a comunitaria, a de innovación e a científica.

Sanidade sinalou que se celebrarán os días 25 e 28 de marzo e contarán coa participación de diferentes administracións --local, autonómica e nacional--; a agrupación industrial das empresas implicadas na prevención, asociacións de pacientes, Anpas e sociedades científicas.

E para coñecer a opinión da cidadanía, a Dirección Xeeral de Saúde Pública enviou unha enquisa a través das redes sociais de Xanela aberta á familia e, en colaboración coa Consellería de Educación, remitiuse tamén a través de Abalar. Na mesma pregúntase pola pertinencia de desenvolver o plan e os ámbitos prioritarios de actuación.

UNHA SECUELA MOI ESTENDIDA

Segundo os datos de Sanidade, en Galicia aproximadamente unhas 850.000 persoas adultas teñen sobrepeso, o que supón o 39,2 por cento da poboación, e uns 357.000 galegos presentan obesidade, o que supón o 13 por cento aproximadamente.

As autoridades sanitarias inciden en que o sobrepeso e a obesidade "son importantes factores de risco" na aparición de enfermidades crónicas que "impactan de modo moi negativo na saúde do individuo no seu día a día".