Falece un septuaxenario ao volante da súa furgoneta ao impactar contra unha barra estabilizadora dun camión guindastre​

O fatal suceso que acabou coa vida dun home de 72 anos ocorreu este mediodía en Vigo, na parroquia de Sárdoma. 

A barra estabilizadora lateral dun camión guindastre despregouse contra unha furgoneta que circulaba en sentido contrario e deixou atrapado ao condutor.

Ambulancia | Foto: EP

Un home de 72 anos de idade, condutor dunha furgoneta, faleceu este mércores en Vigo tras recibir o impacto dunha barra estabilizadora dun camión guindastre despregada accidentalmente.

Segundo informaron fontes do 112 Galicia e da Policía Local, o sinistro produciuse sobre as 13,00 horas, cando un particular alertou a Emerxencias de que a barra estabilizadora lateral dun camión guindastre despregouse e impactara contra unha furgoneta que circulaba en sentido contrario.

Os vehículos implicados circulaban pola Estrada de Lameiro, na parroquia de Sárdoma e, ao cruzarse, a barra do camión despregouse e golpeou á furgoneta, deixando atrapado ao seu condutor dentro.

O CIAE-112 deu aviso á Policía Local e aos bombeiros de Vigo, así como a Urxencias Sanitarias de Galicia-061, pero o persoal sanitario non puido facer nada polo condutor da furgoneta, que morreu como consecuencia do impacto.