Abel Caballero recolle a luva de Marea de Vigo e BNG e ordena a retirada "inmediata" da campaña anti aborto

O rexedor vigués toma a decisión logo das denuncias de Marea de Vigo e o BNG da cidade olívica. 

"Rezar fronte a unha clínica abortista está xenial" é o slogan desta polémica campaña polo que Caballero mostrou o seu "absoluto rexeitamento".

Marquesiña coa polémica campaña | Foto: Marea de Vigo

O Concello de Vigo ordenou a retirada "inmediata" da campaña antiabortista instalada en marquesiñas e mupis de toda a cidade, despois da gran controversia que esta publicidade creou.

Nun comunicado, o Concello indicou que "tan pronto" como tivo coñecemento destes carteis, ordenou a retirada dos mesmos, manifestando o seu "absoluto rexeitamento" a calquera campaña que atente contra os dereitos das mulleres.

Todo iso despois de que Marea de Vigo e o BNG vigués esixisen na mañá deste luns a retirada da campaña antiabortista que a Asociación Católica Propagandistas (AdcP) instalou nas marquesiñas e nos mupis da cidade.

Nun comunicado, a concelleira de Marea de Vigo Oriana Méndez asegurou que esta publicidade incumpre o contrato adxudicado polo Concello á empresa JCDecaux, "que impide claramente a presenza de propaganda sexista ou vejatoria contraria aos dereitos constitucionais".

Na mesma liña falou o concelleiro nacionalista, Xabier P. Igrexas, que sinalou que se trata dunha propaganda "reaccionaria" da "dereita ultracatólica" que usa estes paneis para propagar o seu "discurso do odio".

Esta controversia produciuse despois de que a Asociación Católica de Propagandistas (ACdP) lanzase unha campaña antiabortista en 33 cidades de toda España baixo co lema "rezar fronte ás clínicas abortistas está xenial" para manifestarse contra a Lei do Aborto que expón o Goberno.