Caixabank aumenta un 150% o seu financiamento verde, social e sostible

Durante 2021, CaixaBank emitiu catro bonos propios en formato verde ou social para impulsar os Obxectivos de Desenvolvemento Sostible de Nacións Unidas, por un montante  de 3.500 millóns de euros.

CaixaBank mobilizou 31.275 millóns de euros en financiamento sostible en 2021, un 150% máis que en 2020, segundo un comunicado da entidade este luns.

O financiamento mobilizado a través de préstamos sostibles pechou 105 operacións por valor de 11.595 millóns de euros, un 131% interanual máis.

Estes préstamos divídense entre préstamos verdes, préstamos sociais e préstamos ESG-Linked, que concentraron a maioría das operacións, con 68, e mobilizaron 6.113 millóns de euros.

Entre estas operacións destaca a participación no préstamo sindicado sostible de Acciona, de 3.300 millóns de euros, "a maior operación sostible ata a data en España".

Doutra banda, CaixaBank sumou 19.780 millóns de euros entre emisións propias e alleas de bonos ESG durante o ano pasado, un 164% máis.

En 2021 CaixaBank participou como 'bookrunner' na emisión de 18 bonos ESG, o que supuxo a colocación de 16.200 millóns de euros excluíndo as emisións propias; ademais de 8.030 millóns en bonos verdes, 4.500 millóns en bonos sostibles e 3.500 millóns en bonos propios.

CaixaBank pechou o ano como o sexto banco en financiamento sostible en Europa e o primeiro en España, segundo a clasificación de Refinitiv.