Pedro Sánchez aproba contol horario en empresas e axuda para parados aos 52 anos

O Consello de Ministros aprobou este venres un decreto lei que rebaixa de 55 a 52 anos a idade para que os parados cobren o subsidio e obriga ás empresas para ter un rexistro horario da xornada.

A persoa que solicite o subsidio debe ter uns ingresos inferiores mensuais de o 75% do Salario Mínimo Interprofesional (SMI), de maneira que non debe exceder os 675 euros mensuais. Segundo os cálculos do Goberno, unhas 115.000 persoas pódense beneficiar desta medida. 

A recuperación do subsidio para maiores de 52 anos era unha das cuestións que quedaran no aire tras a non aprobación de Orzamentos de 2019 e a convocatoria de eleccións xerais. Ata o ano 2012, a idade para pedir este subsidio era de 52 anos. Coa reforma laboral do Goberno do PP, a idade de acceso subiuse aos 55 anos.

O subsidio para maiores de 55 anos é unha axuda mensual de 430 euros que o traballador en paro cobra ata que alcanza a idade de xubilación que lle permite acceder a unha pensión contributiva, con independencia da súa modalidade, o que na práctica tradúcese en xubilacións anticipadas forzosas e, por tanto, en pensións de menor contía. Esta medida entra en vigor ao día seguinte da publicación do real decreto no Boletín Oficial do Estado (BOE).

CONTROL DE XORNADA

O real decreto modifica o Estatuto dos Traballadores no que respecta ao rexistro de xornada para que empresas fagan un rexistro diario do horario dos seus traballadores, que debe incluír o inicio e finalización da xornada, "sen prexuízo da flexibilidade horaria".

O borrador establece que as compañías deben conservar os rexistros durante catro anos e que permanecerán a disposición dos traballadores, sindicatos e da Inspección de Traballo e Seguridade Social. As empresas dispoñerán de dous meses desde a publicación do real decreto no BOE para poñer en marcha esta medida.