Aprender a envellecer desde a reflexión a banda interxeracional Deteriorados e outros artistas

A Mostra Escénica de ‘Esenciais 20/50’ é unha invitación para aprender a envellecer desde a arte, o diálogo e a reflexión 

O Teatro Principal de Ourense acolleu a mostra escénica do proxecto ‘Esenciais 20/50’. Sobre o escenario, os protagonistas foron as historias de vida e experiencias dun grupo de persoas que están a afrontar o envellecemento de maneiras diferentes. Artistas, participantes e público xeraron unha atmosfera común na que a palabra “vellez” perdía o seu significado, igualando en condicións a todos os presentes e espertando neles sentimentos de emoción, reflexión e reivindicación.

‘Esenciais 20/50’ é unha chamada para abordar diferentes maneiras de afrontar a vida e o paso dos anos. A propia Cristina Pato anunciaba ao comezo do espectáculo que «hai tantas maneiras de envellecer como persoas no mundo». E, a pesar de que ninguén nos ensine a facelo, «temos que aprender a envellecer, porque a outra opción é criminal», engadiu Xaime Fandiño.

Un evento inclasificable que foi máis aló da música, do teatro ou das historias de vida. Un encontro artístico para rir e chorar xunto ás íntimas intervencións de Maruxa Lorenzo Selas e José Piñeiro. Ambos presumiron da súa «mocidade acumulada cos anos» e reivindicaron un futuro para os maiores (que non vellos), porque «poder soñar non é unha cuestión de idade».

Tamén Xaime Fandiño e Chefa Alonso convidaron os asistentes a reflexionar, a través das súas propias experiencias persoais, sobre a importancia de todos eses pequenos matices dos que se nutre a nosa personalidade ao longo da vida, e do papel fundamental que ten a trasmisión do coñecemento interxeracional na superación dos principais desafíos de crecemento e desenvolvimiento do individuo.

Todo baixo un coidado discurso narrativo que intercalaba as delicadas actuacións da músicas Alba María, Chefa Alonso, Wöyza, Cristina Pato, Raquel Pato, a banda interxeracional Deteriorados, Quela Aydillo e Lara Vazquez e posuíaa de Eva Veiga. Todas xuntas formaron a Orquestra Esenciais, protagonista dunha alquimia sonora dirixida por Chefa Alonso e encargada de pechar a actuación. A asistencia escénica correu a cargo de Mariña Oural, Ugia Pedreira, Cecilia Carballido e Cristina Pato.

“Esenciais 20/50” achegou a Ourense un laboratorio de creación e pensamento ao rededor da arte, a sociedade e a idade. O obxectivo desta iniciativa, creada por Cristina Pato e Xaime Fandiño en colaboración con Rende e a Oficina Galega doutros Asuntos do Movemento, é que os participantes reflexionen e aprendan sobre os estereotipos e as diferentes maneiras de envellecer.

A súa programación nace cun foco interxeracional, centrada nunha serie de talleres interdisciplinares nos que participaron perfís de diferentes xeracións, oficios e vidas creando con eles espazos de interacción ao redor de procesos artístico-pedagóxicos vivenciais. Nesta proposta tiveron cabida dous talleres: un de improvisación oral con Alba María xunto a alumnas do IES As Lagoas; e outro de creación escénica e improvisación sonora con todos os participantes, dirixido por Mariña Oural e Chefa Alonso.