O Consello de Seguridade Nuclear advirte da posible radiación por uraninita na mina de San Finx, Lousame

O documento vén marcado polo requirimento feito polo Consello de Seguridade Nuclear (CSN) ao Goberno de Galicia.

Recentes estudos sinalan que na mina de Lousame pode haber un xacemento de uraninita, mineral do uranio.

Paula Uría | Foto: Xunta.gal

Se xa o proxecto mineiro de San Finx, unha mina de estaño e wolframio, era controvertido, a irrupción do Consello de Seguridade Nuclear (CSN) no taboleiro acende aínda máis a polémica. O CSN, ao fío do estudo da Universidade de Oviedo que demostrou a presenza de uraninita no terreo, vén de requirir á directora xeral de Planificación Enerxética e Recursos Naturais da Xunta, Paula Uría, un estudo radiolóxico da zona para coñecer o alcance e os riscos deste descubrimento.

Disto fanse eco os membros da ONG 'Ecoloxistas en Acción', que xa no seu día "remitiu este estudo tanto á Xunta como ao CSN", aínda que o departamento de Paula Uría "nada fixo respecto diso". Con todo, a plataforma sinala que o Consello alertou ao goberno autonómico de incumprir o regulamento de protección sanitaria contra as radiacións ionizantes.

"A pesar de que o regulamento establece que a minería subterránea e a produción de estaño están suxeitos á presentación de declaracións sobre a exposición dos traballadores e do público á radiación e á elaboración dos correspondentes estudos radiolóxicos, a Xunta en ningún momento esixiu estas actuacións, nin cando aprobou o proxecto de explotación da mina en 2009 nin cando esta reiniciou a actividade en 2015 da man da actual concesionaria Valoriza Minería (filial do Grupo Sacyr)", sinalan os ecoloxistas.

EMPREGADOS EN RISCO POR RADIACIÓN?

Agora é o Goberno de Feijóo o que ten que demandar á empresa ese estudo para máis tarde remitilo ao CSN. Desde Ecoloxistas en Acción tamén sinalan que, neste tempo de actividade, e sempre que se confirmen estes achados, moitos traballadores puideron "verse expostos as potenciais radiacións ionizantes derivadas da presenza de uranio".

A ONG cifra nunha trintena os empregados afectados e acusa á concesionaria de ser "negacionista" cos problemas de saúde laborais polos seus intentos para que non se recoñecese o cancro de pulmón por exposición ao po como doenza profesional.

A continuación, desde Ecoloxistas en Acción puxeron en marcha a campaña 'Algo se esconde' para denunciar "a autorización de proxectos mineiros altamente contaminantes" en Galicia. "Só nos últimos anos, a Xunta aprobou proxectos para minas que non foron sometidas a avaliación ambiental, negou a comparecencia no proceso de autorización tanto a organizacións ecoloxistas como a veciños e escondeu información fundamental sobre os expedientes, que debería ser pública", sentencian.