Xa están á venda as entradas para o concerto de Van Morrison no Coliseo da Coruña

Ademais de por internet, os boletos pódense adquirir fisicamente na Praza de Pontevedra. 

É o primeiro concerto do irlandés na urbe desde o organizado en Riazor con outras grandes estrella nun dos primeiros festexos Xacobeos.

O Concello da Coruña pon á venda este xoves, día 21, as entradas para o concerto que dará Van Morrison no Coliseo o 3 de decembro.

Segundo informa o consistorio, as entradas estarán dispoñibles en Ataquilla desde as 10,00 horas. En total, sairán á venda 6.760 pases, con prezos que parten dos 40 euros.

AFORO LIMITADO
Co concerto de Van Morrison, o Concello da Coruña retoma a programación de primeiras figuras internacionais da música e recupera os concertos co público en pé e cunha capacidade máis ampla que as establecidas por mor da pandemia, aínda que non chega ao 100%.

A actuación, prevista para as 20,30 horas, enmárcase na xira mundial que está a realizar o artista, na que o concerto da Coruña será un dos poucos previstos en España.