Un ourensán atrapado baixo un tractor é a sétima vítima mortal con estes vehículos en dous meses

Desde agosto faleceron sete traballadores do campo con accidentes de tractores en Galicia, ademais de numerosos feridos e hospitalizados.

Un home faleceu tras envorcar o tractor que manexaba e quedar atrapada debaixo no municipio ourensán do Barco de Valdeorras. 

O accidente rexistrouse sobre as 16,30 horas, segundo os datos que manexa o 112 Galicia, no lugar de Coedo. O tractor precipitouse desde un camiño a unha leira e a vítima quedou atrapada baixo o vehículo.

Ata o lugar desprazáronse efectivos de Bombeiros de Valdeorras, Garda Civil GES do Barco e de Protección Civil, ademais do equipo sanitario do 061, que nada puido facer por salvarlle a vida.