(Vídeos) Gardas Civís derruban a manifestantes da Mesa que protestaban contra o Foro La Toja

A Mesa pola Normalización leva anos protestando porque Hotusa utiliza o topónimo deturpado para nomear a este importante evento, que hoxe inauguraron Felipe VI e Feijóo

A concentración convocada pola Mesa no Grove para denunciar a deturpación do topónimo da Toxa por parte do Foro La Toja saldouse con momentos de tensión nos que a Garda Civil chegou a empuxar a varios dos manifestantes para apartalos da estrada.

En concreto, a protesta buscaba criticar o uso deste topónimo por parte do III Foro La Toja 2021, onde este mércores déronse cita o Rey Felipe VI, a vicepresidenta primeira do Goberno, Nadia Calviño ou o titular da Xunta, Alberto Núñez Feijóo, entre outros.

Un grupo de persoas convocadas pola asociación acudiu á ponte preto das 17,00 horas portando diversos carteis co lema 'Eu quero galego' e unha pancarta na que se lía 'A Toxa polo seu nome'.

Nas imaxes vese como os axentes empuxan aos manifestantes. Nun momento chegan a derrubar ao presidente da Mesa, cando xa estaba na beirarrúa.

VERSIÓN DA MESA

Con todo, segundo o relato de participantes na protesta, a Garda Civil non lles permitía cruzar a ponte e producíronse incidentes ao tentar situarse no medio da vía, momento no que varios axentes empuxaron e obrigaron aos manifestantes para apartarse á beirarrúa. Entre eles atopábase o propio presidente da Mesa, Marcos Maceira, que acabou polo chan debido a un destes empuxóns.

En declaracións a Europa Press, Maceira denunciou que os axentes mostraron "moita agresividade" cara a eles desde o primeiro momento e tampouco permitiron intervencións dos portavoces da asociación para dirixirse cara á xente. "Parécenos unha actitude absolutamente irresponsable e absolutamente desproporcionada", censurou.