A Xunta pide agora que a Xustiza aprobe agora o certificado para hostalería e a oposición ve unha chapuza

O Goberno tarda máis de medio día en reaccionar a o pau xudicial que tombou a obrigación de pedir o certificado de vacinación nos establecementos dos municipios con peores niveis.

A Xunta remitirá agora a orde e alega que pensaba que non violaba dereitos fundamentais polo que non a someteu aos xuíces antes.

"Os xuíces din que Galicia ten un goberno de chapuza", acusa o líder do PSdeG. O Bloque di que a Administración está a facer máis dano aos hostaleiros que o virus. Os hostaleiros móvense entre a satisfación pola decisión do TXG e o medo a que lles pechen por completo.

O Goberno galego publica súa intención de pedir de forma inmediata, este venres pola mañá, ao Tribunal Superior de Xustiza de Galicia (TSXG), autorización para seguir esixindo o certificado covid para acceder ao interior dos locais de hostalería nos municipios que están en niveis alto e máximo de restricións, e tamén para o lecer nocturno (nos niveis medio e medio baixo, nos que están abertos os interiores).

Dará este paso tras analizar os autos do TSXG, que este xoves decretou que a obrigación estipulada pola Xunta non ten vixencia tendo en conta que non pediu aval xudicial antes de fixar esta esixencia para tratar de controlar os efectos da covid-19 na quinta onda da pandemia.

ARGUMENTACIÓN DA XUNTA
Nun comunicado, o Executivo galego considera que o máis procedente é solicitar, canto antes, dita autorización, para "evitar calquera dúbida en relación coa vixencia e eficacia" destes certificados e fomentar así a seguridade xurídica. A autorización poderá ser solicitada este venres pola mañá e o obxectivo da Xunta é poder recibir o visto e prace do TSXG canto antes.

A Xunta argumenta que, aínda que entendera que as medidas en cuestion non afectan a dereitos fundamentales, á vista do criterio posto de manifesto polo TSXG, o Executivo galego estima que "o máis procedente" é solicitar a autorización canto antes.

A Administración autonómica lembra que, en todo caso, "o seu empeño é garantir o libre exercicio destas actividades económicas, compatibilizándoo coa maior seguridade sanitaria posible". Así mesmo, subliña que a esixencia deste certificado permitiu a apertura dos interiores da hostalería e restauración en situacións en que antes estaban pechados, así como do lecer nocturno, en circunstancias en que antes estaba suspendido.

Por iso, enténdese que a esixencia de certificados é, en todo caso, "unha medida alternativa menos gravosa" que o peche destas actividades.

AVAL DA LEI GALEGA
En particular, considérase que estas medidas baséanse no artigo 38.1, 'Medidas preventivas en materia de saúde pública', da Lei de Saúde pública de Galicia, (redactado pola Lei 8/2021), que permite que ao obxecto de protexer a saúde pública, as autoridades sanitarias autonómicas poderán adoptar medidas preventivas de obrigado cumprimento cando exista ou se sospeite razoablemente a existencia dun risco inminente e grave para a saúde da poboación. Estas medidas poderán consistir en: "Medidas de seguridade sanitaria e hixiene en determinados lugares e/ou para o desenvolvemento de actividades".

Así mesmo tamén ofrece base legal á medida o contido da letra k) deste artigo 38.1, ao permitir o establecemento polas autoridades sanitarias dun deber de "subministración de datos" necesarios para o control e contención de riscos para a saúde pública.