Adeus á vella bancada de Marcador en Balaídos cambiada por unha nova 30 metros máis preto (vídeos)

O Concello de Vigo empezou hoxe a derriba da infrestructura que permitirá que a aficción estea máis preto dos xogadores do Celta.

Demolición en Balaídos nunha imaxe de Ana Luvas 

As obras de demolición da antiga bancada do estadio municipal Abanca Balaídos comezaron formalmente este luns, e desenvolveranse ao longo do próximo "mes ou mes e medio", segundo explicou o alcalde, Abel Caballero, que lembrou que a nova bancada será financiada por Concello e Deputación, cun investimento duns 15,5 millóns de euros.

Segundo explicou o rexedor olívico en rolda de prensa, tras o traslado dos sistemas de cableado e do servizo de Bombeiros (que tiña un dos seus parques nos baixos do estadio), iniciaranse os traballos de derriba, que supoñerán demoler unhas 10.000 toneladas de formigón.

A nova bancada contará con novos accesos, 8 ascensores e asentos a pé de campo, en concreto, subliñou Caballero, "30 metros máis preto" do terreo de xogo.

SEN DIÑEIRO DA XUNTA
O alcalde insistiu en que a práctica total da reforma do estadio está a ser sufragada por Concello e Deputación (ata o de agora o investimento ascende a 27,5 millóns de euros).