Así é o novo Aerobús de Barcelona, que xestiona a empresa galega Monbús

A compañía de Lugo opera este importante contrato público cunha nova frota de autobuses que son máis sostibles, pois ou ben son 100% eléctricos ou son híbridos

Presentación do novo Aerobús de Barcelona  nunha foto de @jaumecollboni

A Área metropolitana de Barcelona (AMB) presentou a renovación do servizo de Aerobús que conecta o centro de Barcelona co Aeroporto do Prat todos os días do ano, e que pasará a funcionar as 24 horas do día e estreará 33 novos autobuses híbridos e eléctricos, operados pola empresa lucense Monbus.

O servizo deseñado e licitado polo consorcio metropolitano pasou por un "proceso de renovación". Desde o pasado 14 de xullo o Aerobús está xestionado por unha UTE de tres empresas adheridas a Monbus.

O vicepresidente de Movilidad do AMB, Antoni Poveda, subliñou que traballan nun modelo máis sostible e saudable que "pasa pola mellora da xestión dos fluxos de mobilidade ao redor de grandes infraestruturas, como o Aeroporto".

O primeiro tenente de alcalde de Barcelona, Jaume Collboni, asegurou que este servizo cumpre todas as medidas de seguridade necesarias contra a Covid-19 e é respectuoso co medio ambiente.

Ademais, o presidente de Monbus, Raúl López, asegurou que apostan por optimizar o servizo con solucións de mobilidade baseadas na utilización de novas tecnoloxías para ofrecer "maior calidade" aos usuarios e ser máis eficientes, sostibles e seguros.

PREZOS MÁIS DIVERSOS
O novo servizo contará cun abanico máis amplo de tarifas e estarán dispoñibles os billetes combinados con outros medios de transporte metropolitano, o que permitirá a ligazón con Metro e autobuses de Transports Metropolitans de Barcelona (TMB).

Tamén se creou un paquete de viaxe que inclúe o billete de ida e volta en Aerobús e o Ola Barcelona Travel Card, que permite moverse "sen límites" co transporte público durante os días nos que se visita a cidade.