O alcalde de Vilagarcía pide que as terrazas poidan traballar ao 100% nos municipios con nivel de restricción alta

|

O SERGAS dialoga cos municipios do Salnés tras a polémica das súas limitacións, de nivel alto, superiores ás restricións de Sanxenxo, de nivel medio, a pesar de que todos están en el máximo nivel de alerta posible segundo a incidencia acumulada semanal



Varias persoas nunha terraza do paseo marítimo da praia de Sanxenxo, ao 4 de xuño de 2021, en Sanxenxo, Pontevedra, Galicia, (España). O aumento das temperaturas e a progresiva mellora de

Varias persoas nunha terraza do paseo marítimo da praia de Sanxenxo, ao 4 de xuño de 2021 


O conselleiro de Sanidade, Julio García Comesaña, trasladou a alcaldes da comarca do Salnés que este venres o subcomité clínico revisará a evolución dos municipios da zona, reunión na que se poden adoptar cambios no nivel de situación epidemiolóxica de cada localidade.


TRATO DE FAVOR A SANXENXO?

Así o sinalou o Concello de Vilagarcía nun comunicado remitido aos medios, despois dunha reunión mantida na tarde deste xoves na que se abordou o malestar e a inquietude manifestados polos rexedores de Vilagarcía, Vilanova, Cambados e A Illa, todos eles sometidos ás restricións que corresponden ao nivel alto a pesar de ter menor incidencia que Sanxenxo, que está no medio.


O alcalde de Vilagarcía, Alberto Varela, transmitiu aos responsables de Sanidade que, no caso de que se reduzan as restricións, os cambios entren en vigor de inmediato, de maneira que non sexa necesario esperar varios días para que sexan efectivos, previa publicación no Diario Oficial de Galicia (DOG). O conselleiro de Sanidade, asistido por varios técnicos, mantivo esta tarde unha reunión por videoconferencia cos alcaldes de Vilagarcía, Sanxenxo, Vilanova, A Illa e Meaño, na que tamén participaron concelleiras de todos os demais municipios do Salnés.

Foran os propios alcaldes dos concellos afectados quen solicitara este encontro ao obxecto de que lles detallasen polo miúdo cales son os novos criterios que se están aplicando para determinar a posición de cada territorio no nivel de risco e, por tanto, tamén de restricións.

 

TERRAZAS

O alcalde de Vilagarcía tamén explicou aos responsables da consellería as propostas dos hostaleiros da localidade, que se basean no feito de que, xa que é no exterior onde menos riscos hai, sempre que se respecten as distancias, sería posible manter a actividade das terrazas ampliando a súa superficie.


Outra das medidas expostas sería unha modificación das licenzas, de maneira que así se puidese aliviar a difícil situación do sector á vez que se garante a seguridade nos momentos de lecer.

Sanidade indicou que estudará as propostas que fixeron os alcaldes, que estarán atentos ao posible debate desas medidas no seo do comité clínico. 


Precisamente, preguntado na rolda de prensa posterior ao Consello polas críticas relativas a que deixase en nivel medio a Sanxenxo cunha incidencia maior, o vicepresidente primeiro da Xunta, Alfonso Rueda, asegurou que foi unha decisión do comité clínico que a Xunta "acata".

"Vostedes saben que se algo fixo a Xunta sempre foi acatar as decisións do comité clínico e despois tentar implementalas e tratar que sexan entendidas como decisións obxectivas".

Ademais, indicou que o encontro cos alcaldes, o conselleiro explicaría "a necesidade, a obxectividade e a razón" das medidas que toman os expertos reunidos neste órgano.

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress