Sanidade e o Concello de Sanxenxo, unha unión para "mellorar a seguridade e funcionamento do lecer nocturno"

O goberno do municipio pontevedrés, que experimenta unha preocupante alza de casos activos, e a Xunta, traballan nunha estratexia conxunta para garantir a seguridade de veciños e turistas.

Así, o obxectivo é idear un sistema que "permita aos veciños e visitantes poder realizar probas diagnósticas que contribúan a mellorar a seguridade e o funcionamento do lecer nocturno".

Novos ante locais lecer nocturno en Sanxenxo | Foto: EP

O Concello de Sanxenxo (Pontevedra) colabora coa Consellería de Sanidade para facer probas de detección de casos de Covid-19 que contribúan a "mellorar a seguridade e funcionamento do lecer nocturno".

Así o informou este Concello nun comunicado de prensa, no que explica que Sanxenxo "ten nestes momentos 75 positivos que supón unha incidencia por encima de 250 casos por cada 100.000 habitantes".

Por iso, explica que o Concello de Sanxenxo e a Consellería de Sanidade "están a traballar xa na procura dunha estratexia" que, puntualiza, "permita aos veciños e visitantes poder realizar probas diagnósticas que contribúan a mellorar a seguridade e o funcionamento do lecer nocturno".

"Nas últimas horas moitos negocios transmitíronnos a súa preocupación polo incremento dos casos", destacou o Concello desta localidade das Rías Baixas que no verán rexistra un aumento de poboación pola chegada de xente de fóra.

Por iso, subliña que "o goberno de Sanxenxo con humildade, pero con convicción quere ser altofalante de miles de familias que viven da hostalería e a actividade turística" e, conclúe, "ven con gran preocupación que se poida truncar a recuperación dos seus negocios".