Lugo recupera o emblemático mapa da Península Ibérica do Parque de Rosalía de Castro

A cidade de Lugo recuperou o emblemático mapa da Península Ibérica do Parque Rosalía de Castro, unha instalación que data da década de 1920 e que, tras permanecer inactiva durante anos, foi restaurada e renovada.

"Este mapa non só ten un valor didáctico senón tamén emocional, ao ser aquí onde moitas xeracións de lugueses adquiriron e reforzaron os seus coñecementos de xeografía", asegurou a alcaldesa de Lugo, Lara Méndez, este venres durante a posta en marcha do novo mapa.

A instalación foi renovada para incorporar luces led brancas que sinalizan as capitais de provincia e Lisboa, así como outras vermellas que indican a localización de 14 faros. Ademais, dispón dun circuíto de auga para situar o leito dos ríos da península.

Este mapa data do ano 1928, cando o presidente do directorio militar Miguel Primo de Rivera propuxo a súa colocación no parque durante a etapa á fronte do consistorio lugués do rexedor Ángel López Pérez.

O mapa, realizado a escala 1:250.000 e cunhas dimensións de 4,90 metros por 3,6; supuxo un desembolso de 11.650 pesetas para as arcas municipais, segundo explicou a rexedora.

A recuperación do mapa forma parte do plan de recuperación do Parque Rosalía de Castro, que o próximo 2 de xullo celebra o seu centenario.

"Unha zona verde emblemática da capital, que queremos poñer en valor para dignificar os fortes lazos identitarios e afectivos que nos unen con ela", incidiu Méndez.