Os test de saliva para detectar o coronavirus estarán dispoñibles en todas as farmacias de Galicia

Ás provincias de Pontevedra e A Coruña súmanse agora as de Lugo e Ourense despois do acordo alcanzado o Executivo autonómico.

Ata o de agora, xa se realizaron 82.000 probas deste tipo, cun resultado de só 177 delas positivas. A Xunta recalca as "garantías" destas probas. 

Acordo das farmacias de Lugo e Ourense coa Xunta | Foto: EP

A Consellería de Sanidade estendeu ás provincias de Lugo e Ourense o acordo para que as oficinas de farmacia realicen test de detección da covid-19 en saliva, polo que este sistema xa se atopa dispoñible en toda Galicia.

Isto foi posible debido a que o conselleiro de Sanidade, Julio García Comesaña, asinou esta semana os correspondentes convenios de colaboración cos presidentes dos colexios oficiais de farmacéuticos de Lugo e Ourense, Alejandro Sánchez Pérez-Mel e Santiago Leis Vence, respectivamente.

Ademais, na firma estiveron presentes o secretario xeral técnico da Consellería, Alberto Fuentes Losada, e a directora xeral de Saúde Pública, Carmen Durán Parrondo.

A través destes convenios, xa activos nas provincias da Coruña e Pontevedra desde febreiro e marzo, inícianse os protocolos previstos para a detección de casos de coronavirus en persoas asintomáticas.

Serán as farmacias as que recollan as mostras de saliva a través dun kit que ofrecerán a cidadáns comprendidos na poboación diana establecida por Sanidade, entre os 12 e os 64 anos.

Posteriormente, as mostras serán remitidas ao laboratorio de microbiología do Servizo Galego de Saúde (Sergas) en Vigo, para a súa análise a través do sistema 'pooling'. O resultado comunicaráselle á persoa particular e, no caso de que sexa positivo, realizaráselle unha proba PCR nasofagíngea.

É un sistema que, segundo asegura Sanidade, conta "con todas as garantías" do Sergas. Desde a súa posta en marcha, realizáronse sobre 82.000 probas, das que 177 resultaron positivas.