A Xunta publica a OPE para Sanidade: 1.215 prazas, das que 1.203 pertencen ao persoal estatutario

A OPE de 2021 vén de ser publicada no Diario Oficial de Galicia e ofrece máis dun milleiro de prazas, esgotando así a taxa máxima de reposición de efectivos autorizada. 

As prazas ofertadas para o persoal licenciado sanitario ascenden a 65; 686 prazas son para o colectivo de persoal sanitario diplomado e de formación profesional e 200 para celador.

Oposicións | Foto: EP

O Diario Oficial de Galicia (DOG) publica na súa edición deste luns, 3 de maio, a oferta pública de emprego (OPE) do Sergas para este exercicio que inclúe 1.215 prazas, delas 1.203 de persoal estatutario.

A nova oferta de prazas do departamento sanitario galego engádese ás aprobadas por este organismo de modo continuo desde o ano 2012, o que supón, no total do período, 8.112 prazas.

O obxectivo, destaca Sanidade, "é dar resposta ás necesidades asistenciais e organizativas identificadas como prioritarias polo Sergas, con especial atención aos ámbitos asistenciais cunha maior demanda de efectivos, e de necesario reforzo no actual contexto de crise sanitaria derivada da pandemia da Covid", como a Medicina de Familia e, principalmente, Enfermería e as súas especialidades.

As prazas ofertadas para o persoal licenciado sanitario ascenden a 65, das cales 60 corresponden a médico de familia. Así mesmo, no que se refire ao colectivo de persoal sanitario diplomado e de formación profesional, o total de prazas que se oferta é de 686.

Desas 686, un total de 604 corresponden á categoría de Enfermería, unha cantidade que sumada ás 466 incluídas nos decretos de 2019 e 2020, concreta Sanidade, "permitirá desenvolver un proceso selectivo para a cobertura de 1.070 prazas desta categoría".

Sanidade incide en que con esta oferta continúase "impulsando a progresiva dotación de prazas e a incorporación de persoal fixo das especialidades de enfermería, coa aprobación de 44 novas das especialidades de saúde mental, familiar e comunitaria, pediátrica, e obstétrico-xinecolóxica.

Así mesmo, a Consellería destaca que se ofertan cinco prazas para a categoría de técnico superior en dietética, categoría recentemente creada polo Sergas. E refórzase o emprego fixo nas categorías de persoal de xestión e servizos, con 452 prazas, entre elas, 200 para celador, 155 do grupo auxiliar da función administrativa, e 18 para traballadores sociais.

Sanidade lembra que o sistema selectivo será o de concurso-oposición, e respectará os principios de "libre concorrencia, igualdade, mérito e capacidade", abunda. Ademais, indica que do total de prazas reservaranse 61 para o acceso de persoas con discapacidade, e 25 con discapacidade intelectual, así como as correspondentes para a súa provisión polo sistema de promoción interna.