O Grove e A Pobra deixan unhas máximas restricións que seguen en Carballeda, Cualedro e Vilanova

A tendencia xeral en Galicia deixou de crecer pero o Sergas aposta pola prudencia e non hai máis alivios xerais. 

Só hai cambios nos niveis de determinados municipios reducíndose o número dos perímetros.

Os municipios do Grove (Pontevedra) e A Pobra do Caramiñal (A Coruña) sairán na medianoite do xoves ao venres do grupo de concellos con máximas restricións pola pandemia, no que se manterán Carballeda de Valdeorras (Ourense), Cualedro (Ourense) e Vilanova de Arousa (Pontevedra).

Así o acordou o comité clínico que asesora á Xunta na xestión da pandemia de covid-19 na súa reunión deste martes, da que informará o conselleiro de Sanidade, Julio García Comesaña, nunha rolda de prensa convocada para a mañá do mércores.

Deste xeito, O Grove e A Pobra, localidades baixo as máximas restricións desde o 9 de abril, baixan ao nivel alto, polo que quedarán de novo abertas perimetralmente e poderá retomar a súa actividade os negocios de hostalería, aínda que co servizo limitado ás terrazas e cun aforo do 50%.

Por contra, as máximas restricións continuarán imperando en Carballeda de Valdeorras, Cualedro e Vilanova de Arousa, únicos tres municipios dos que os seus veciños non poden saír salvo causas xustificadas, a hostalería permanece pechada e están prohibidas as reunións de non conviventes.

No segundo chanzo de restricciones, ademais da Pobra e O Grove, atópanse Petín, Muíños, Verea, A Merca, Meira, Ribadumia, Marín, Meaño, Meis, Ponteareas, Salceda de Caselas, Ribeira, Cambre e Coristanco.

Ademais, case 30 concellos quedan en nivel medio, isto é, cos aforos da hostalería reducidos ao 30% en interiores e ao 50% en terrazas.

Entre estes municipios está Vigo, a única das sete grandes cidades galegas neste nivel de restricións. Xunto á urbe olívica atópanse Lobeira, Lobios, Verín, Cartelle, Xinzo de Limia, O Barco de Valdeorras, Trabada, Barreiros, Chantada, Cambados, Sanxenxo, Vilagarcía de Arousa, Poio, Cangas, Gondomar, O Porriño, Nigrán, Tui, Rianxo, Mesía, Carnota, Carral, A Laracha, Betanzos, Carballo e Ares.

O resto de municipios galegos atópanse en nivel medio baixo. Os cambios impostos pola Consellería de Sanidade este martes entrarán en funcionamento a partir da medianoite do xoves ao venres 30 de abril.