Gadisa creou case un emprego ao día no seu último exercicio e conta con case 8.000 traballadores en persoal

Gadisa vén de anunciar a creación de 347 postos de emprego no seu último exercicio, o que deixa unhas cifras próximas aos 8.000 traballadores no persoal da cadea de supermercados.

Ademais, desde Gadisa recalcan que manteñen vixentes o seu convenios con centros educativos e institucións co fin de "contribuír á formación laboral de diferentes colectivos".

Supermercados Gadis | Foto: EP

A compañía distribuidora galega Gadisa incorporou no último exercicio a 347 profesionais ao seu equipo humano, co que, a peche de 2020, rozaba os 8.000 traballadores --un total de 7.992, concretamente--.

"Xeramos practicamente un emprego diario", indicou a empresa nun comunicado, no que tamén destacou que "a contratación de profesionais foi en aumento ano tras ano". Gadisa conta actualmente cunha rede de supermercados composta por 224 establecementos propios Gadis, 200 Cluadio e 12 Cash Ifa, situados en Galicia e Castela e León.

"Gadisa é unha das empresas que máis postos de traballo proporciona na comunidade e a que maior número de persoas emprega do seu sector en Galicia. No últimos cinco exercicios, o persoal incrementouse en 1.328 persoas, o que supón un crecemento do 20%", remarcou a compañía.

A empresa destacou que os recursos humanos son o seu "principal valor", para o que promoven o seu "desenvolvemento persoal e profesional". Segundo subliñaron no comunicado, un 60% do equipo --4.825 traballadores-- recibiu formación adecuada ao seu perfil en 2020. Unha aprendizaxe que, para o persoal dos puntos de venda, "oriéntase a proporcionar o mellor servizo de atención aos clientes e a satisfacer as súas necesidades respondendo ao concepyo de tenda tradicional".

Ademais, do total de empregados, 342 promocionaron internamente durante o exercicio anterior e "máis de 500 dispoñen de horarios adaptados para a conciliación familiar" --maternidade, paternidade e coidado de maiores--.

CONVENIOS COLABORATIVOS

Doutra banda, a compañía mantivo vixentes os convenios de colaboración con diferentes centros e institucións --Cruz Vermella e Cáritas, entre outras--, "co fin de contribuír á formación laboral de distintos colectivos". "No marco destes acordos, 245 estudantes realizaron prácticas en Gadisa", explicou a empresa galega.

Nesta mesma liña, a compañía valora "a colaboración empresarial coa formación ocupacional como unha das vías para xerar emprego de calidade". Tal e como indicou a distribuidora, dos 61 alumnos que participaron no programa "para compartir coñecementos e experiencia nas diferentes seccións de produto", 46 foron contratados --máis 75% do total--. "Tamén proporcionou, un ano máis, formación práctica a 23 estudantes procedentes de FP Dual", apuntou.

"O obxectivo é continuar crecendo da man dos produtores locais --agricultores e gandeiros, entre outros--. Esta filosofía contribúe á dinamización de sectores produtivos estratéxicos, como a pesca, a agricultura ou a gandería, que supoñen unha importante achega á xeración de riqueza sostible e a fixar poboación en contornas semiurbanos e rurais", explicou a compañía no comunicado, onde fixo fincapé ademais no papel "destacado" das franquías Claudio nestas zonas, con case 900 traballadores directos.