​Estas son as contas dos equipos galegos na última xornada da Segunda B

Ata dous equipos galegos dos catro con opcións poderían selar o seu concurso na Primeira Federación o ano que vén e pelexar por subir a Segunda División.

O Racing de Ferrol é un dos equipos con opcións de ascenso 

Técnicos, xogadores e afeccionados do Celta B, SD Compostela, Racing de Ferrol e Deportivo da Coruña levan desde o pasado domingo coa calculadora na man. As contas, aínda que claras, repásanas unha e outra vez na cidade olívica, na cidade departamental, na cidade herculina e na capital galega, onde apuran todas as opcións para lograr a última praza para tratar de ascender a Segunda División ou, en todo caso, asegurarse un posto na Primeira Federación do ano que vén.

O Celta B, con 27 puntos e terceiro clasificado, é o que mellor o ten. Con gañar ao Coruxo en Ou Vao xa estaría libre de todo mal e sen importar o que ocorra nos demais campos. A pesar de todo, podería darse mesmo situacións tan rocambolescas como empates na clasificación, xa sexan simples, triplas ou ata cuádruplos. Nesta última opción, no caso de que Celta B, Dépor, Racing e Compos empaten a 27 puntos (derrota do Celta, empate de Racing e Dépor e vitoria do Compos) o beneficiado sería o cadro ferrolán.

Se o empate é do Dépor co Celta B e o Compos, pasan os da capital; se o empate é Celta B, Dépor e Rácing, de novo os verdinegros pasarían á seguinte fase. Ao Dépor só pasaría nun hipotético empate a puntos co Celta B. Doutra banda, aos coruñeses unha vitoria daríalle moitas opcións, sempre que o filial celtiña non gañe, pero en fronte terán ao líder, un Zamora que a pesar de estar clasificado aspira a seguir sumando na carreira pola Segunda División. Logo, o que ocorra entre Racing e Unionistas daría a última praza ou aos ferroláns ou aos charros.

O Dépor o que non pode, en ningún caso, é descender esta xornada, como tampouco o farán Compos ou Racing, algo que quedará para Pontevedra e Coruxo, que pelexarán na seguinte fase para non caer á temida quinta categoría. Quedar segundos da liguiña que enfrontará aos catro últimos dos dous subgrupos do Grupo I permitiralles salvarse e caer, só, á Segunda Federación.