A difícil tarefa dos concellos galegos para cumprir coa Xunta en Semana Santa: limitar aforos das praias

Ante a previsible chegada de visitantes ás praias galegas en Semana Santa, a Xunta impulsou unha regulación destes espazos, coa obrigatoriedade de usar máscara salvo durante o baño ou cando o usuario "permaneza tombado". 

O límite nas reunións será de seis non conviventes e os gobernos municipais deberán limitar os aforos e garantir a distancia de seguridade nos areais. 

Espérase que a Semana Santa supoña a chegada de viaxeiros ás zonas de praia | Foto: EP

Para os días festivos de Semana Santa, a Consellería de Sanidade incluíu na orde de medidas de prevención da covid-19 que entra en vigor este venres a regulación do uso de praias, onde, como ocorreu durante o pasado verán, os respectivos concellos deben limitar os aforos para garantir a distancia de seguridade e cínguense os grupos ao máximo de seis persoas, en caso de ser non conviventes.

En concreto, a orde publicada no DOG deste mércores lembra que "o concello respectivo deberá establecer limitacións tanto de acceso como de capacidade" nas praias, co obxectivo de asegurar que se poida manter nelas a distancia de seguridade.

Para calcular esta capacidade máxima, considérase que a superficie de praia que vai ocupar cada usuario será, polo menos, de catro metros cadrados.

Do mesmo xeito, a situación dos obxectos persoais, como toallas ou hamacas, "levará a cabo de forma que se poida manter a distancia de seguridade" con respecto a outros usuarios. Respectarase, ademais, o límite máximo de seis persoas por grupo, excepto no caso de conviventes.

A máscara debe utilizarse para todos os desprazamentos --entradas, saídas e paseos-- e unicamente poderá quitarse durante o baño e mentres se permaneza nun espazo determinado sen desprazarse e haxa distancia de seguridade entre non conviventes.

TEMPO LIBRE

Do mesmo xeito que na anterior normativa, poderanse realizar actividades de turismo ao aire libre organizadas por empresas habilitadas. Para elas, amplíanse os aforos, xa que poderán ser dun máximo de oito persoas máis o monitor, sexan ou non conviventes.

Nos centros de interpretación e visitantes, aulas de natureza, casetas e puntos de información da rede de espazos protexidos non se poderá exceder o 50 por cento da súa capacidade e respectarase o máximo de seis persoas nas actividades de grupo, sexan ou non conviventes.