Santiago ten orzamentos ao superar Bugallo a cuestión de confianza tras deixar BNG e CA o pleno
O político do PSOE pedira ás outras formacións de esquerdas que permitisen que a moción de confianza saíse adiante e parece que o logrou
Coa manobra de hoxe, BNG e Compostela Aberta conseguen non dar o seu apoio a Bugallo e á vez non atrasar as contas
De haberse enrocado nacionalistas e rupturistas, Santiago aprobase as súas contas igual, pero un mes máis tarde, dado que non hai alternativa posible a un goberno do PSOE pois o PP non ten con quen pactar
Parte dos concelleiros participaron usando Internet debido ás restricións polo COVID
O alcalde de Santiago de Compostela, Xosé Sánchez Bugallo, superou este mércores a cuestión de confianza á que someteu a aprobación dos orzamentos municipais para 2021 cos votos a favor dos seus dez edís e o rexeitamento dos oito do Partido Popular.
A cuestión de confianza que permite aprobar as contas para este ano saíu adiante só cos votos dos socialista despois de que tanto Compostela Aberta como o Bloque Nacionalista Galego abandonasen a sesión.
O feito de que ambas as formacións, que se mostraron moi críticas coa "falta de diálogo" dos socialistas para configurar as contas, abandonasen a sesión permitiu que a cuestión saíse adiante só co apoio dos dez edís socialistas, que se impuxeron aos oito votos en contra do grupo municipal do PP.
O BNG e Compostela Aberta logran así que non llos poida acusar de aprazar a aprobación das contas un mes sen ofrecer alternativa real e, ao mesmo tempo, evitan aparecer como apoios de Bugallo ante os seus electores.
Escribe o teu comentario