A melloría aguanta unha semana tras o primeiro alivio de restricións, pero as curvas se aplanan

Galicia encadea tres días seguidos de alza de novos positivos de coronavirus. Con todo, as cifras son modestas e as medias semanais e a 14 días seguen á baixa. 

Unha semana despois da primeira desescalada seria das restricións -o día 26 abriu a hostalería e se desperimetraron varias áreas sanitarias- non hai indicios claros de ningún repunte. 

Os 161 novos diagnósticos comunicados hoxe son uns poucos máis que os de onte. Con todo, a incidencia acumulada semanal baixa outro banzo, de 46 a 42 positivos por cada 100.000 galegos. De manter este ritmo de descenso, este indicador sairá do nivel de risco medio actual e caerá a risco a principios da próxima semana.

A incidencia acumulada a dúas semanas ten máis camiño que baixar antes de pasar a risco baixo. Hoxe descende de 113 a 117 e necesita reducirse a menos de 50 para pasar ao seguinte chanzo do semáforo estatal de alertas. Por agora, seguimos e seguiremos en risco medio. Está por ver se dá tempo a entrar en risco baixo antes de que se produza o inevitable repunte.

En todo caso, ningunha das dúas series dá mostras de que ese repunte vaia ser moi pronto. Iso si, como era de esperar, a melloría perde cada vez máis brío.

A taxa de positividade tampouco mostra indicios dun empeoramento significativo. O 2,2% coñecido hoxe é a  cifra no últimos catro días, pero a media semanal segue caendo. De feito, o 2,6% de media actual é a mellor taxa na segunda e terceira onda.

EVOLUCIÓN DO CAMBIO DE CASOS ACTIVOS

A derivada da curva de infectados reflicte moi ben a tendencia actual. Cada vez hai menos casos activos, pero cada vez o ritmo de caída é menor.

Hoxe a derivada da curva de casos activos cae un -5%, axudando a situar á media semanal nun -5,8%. Por agora, a perda de velocidade da melloría non é moi pronunciada e pódese explicar, polo menos en parte, pola cada vez maior escaseza de pacientes aos que darlles o alta. Galicia contabiliza 4.453 casos activos , fronte aos máis de 23.000 que chegou a ter no pico de finais de xaneiro. É a menor cifra de infectados de 2021.

CONCLUSIÓNS

Con todas estas cifras sobre a mesa podemos inferir que:

• A pandemia continúa en retirada en Galicia a unha considerable velocidade, máis rápido que noutras desescaladas. 
• A deceleración da melloría non é unha boa noticia, pero por se soa non constitúe un sinal claro dun próximo rebote. Ningún outro indicador está a cambiar de rumbo, aínda que si están a perder empuxe no seu descenso.
• Pasou a penas unha semana desde que a Xunta aplicou a primeira desescalada importante de restricións. É demasiado temperán para percibir o eventual repunte nas estatísticas, pero de producirse non debese estar moi lonxe de empezar a notarse.
• Repunte que a experiencia nos indica que sucederá, tarde ou cedo, ata que alcancemos a aínda afastada inmunidade de grupo. Unha das variables que máis está a influír na pandemia é a mobilidade. A máis mobilidade, máis contagios. 
• Un eventual repunte agora pode ser máis perigoso, porque a Xunta a cepa británica xa é maioritaria. A cepa británica propágase máis rápido e en Galicia está a demostrar ser máis mortal. A taxa de letalidade a 30 días segue en niveis récord.

ÚLTIMOS DATOS POR ÁREAS

A Coruña, unha das dúas áreas sanitarias que a Xunta mantén perimetrada, volve ser a única que supera os 50 novos diagnósticos, con 63. Excelentes cifras de Santiago e Lugo, con menos de 9 novos positivos. Tamén aparentan ser bos os datos de Ourense, pois dos seus 11 positivos, 7 proceden de un único brote, xa identificado na residencia Santa Mariña de Xinzo.

Só na Coruña quedan máis de 20 enfermos críticos. Con 33 enfermos en UCI por covid e 126 en cama convencional, é a área con máis presión hospitalaria. Con todo, o nivel de presión non ten nada que ver co do pico, cando chegou a soportar preto de 80 enfermos críticos. Máis análise en detalle dos números a nivel municipal e de distrito sanitario nuns minutos en Galiciapress.