Coronavirus Galicia: mellores datos de contagios desde principios de agosto pero a letalidade segue disparada

Os últimos datos do coronavirus en Galicia volven ser excelentes, salvo a alarmante subida da taxa de letalidade. Hai que remontarse ao 6 de agosto para atopar tan poucos contagios.

O Ministerio de Sanidade confirmou onte que a cepa británica é dominante en Galicia, algo que a Xunta xa apuntara. A subida da taxa de letalidade confírmao. Nos últimos 30 días chega ao 4,4%, cando en todo o que levamos de pandemia en Galicia roza o 2%.

Os 70 novos positivos de hoxe contribúen a afundir a incidencia acumulada semanal a 48 diagnósticos por 100.000 habitantes.  Galicia segue pois en risco medio segundo este indicador no semáforo estatal de alertas. Necesita descender a 25 para entrar en risco baixo. A este ritmo, conseguiríao o vindeiro domingo ou o luns.

A incidencia acumulada a dúas semanas baixa a 119 tras un mes de descensos constantes. Nin a semanal nin a bisemanal dan indicios dun rebote pronto, a pesar de que o seu ritmo de descenso relaxouse moito, as súas curvas non se han aplanado do todo aínda. 

Este esborralle dos positivos prodúcese á vez que unha forte caída das probas realizadas. Con todo, afortunadamente, a taxa de positividade non está rebotando, ao revés. Isto indica que o menor número de probas non está a resultar insuficiente para identificar os contagios, polo menos por agora.

Así, a taxa de positividade das PCRs foi onte do 1,7%. Non só é o mellor dato desta onda, é a menor taxa de positividade desde o 4 de agosto polo menos. Un dato buenísimo que contribúe a reducir a media semanal a 3,2%, a mellor porcentaxe desde o 6 de agosto.

EVOLUCIÓN DA PORCENTAXE DE CAMBIOS DE CASOS ACTIVOS

A derivada da curva de infectados tamén trae boas noticias. Os casos activos descenden en 399, un -4,9% en termos porcentuais. A media semanal mellora e pasa do -6,1% ao -6,2%.

Isto quere dicir que o ritmo de descenso da pandemia mantense, mesmo acelera un pouquiño. Aínda que non é tan veloz como o era a semana pasada, cando a media semanal tocou chan con 6,6%, a penas a perdido brío desde entón. En termos absolutos isto tradúcese en 4.953 casos activos. Hai que remotarse ao 16 de outubro para atopar tan poucos infectados en Galicia.

CONCLUSIÓNS

Con todas estas series á nosa disposición, podemos inferir que:

• A pandemia segue en retirada, perdendo terreo a un ritmo veloz, aínda que xa non tan rapidísimo como a semana pasada.
• Non hai ningún indicio dun rebrote pronto. Que baixase a velocidade do descenso de casos activos non é unha boa noticia, pero por se só non constitúe un indicio de repunte. Simplemente, hai menos enfermos e, por tanto, menos pacientes que reciben o alta.
• A pesar de que unha parte importante da poboación máis vulnerable está vacinada ou xa faleceu, a taxa de letalidade está desbocada. Isto non se debe a un empeoramento do labor do SERGAS. É consecuencia de que a variante británica é máis contaxiosa e tamén máis mortal. A Xunta acaba de confirmar o falecemento de 14 persoas onte. 
• En definitiva, hai relativamente pouco covid-19 circulando agora mesmo en Galicia, hai meses que non había tan pouco; pero é máis contaxioso e máis letal.

ÚLTIMOS DATOS POR ÁREAS

Segunda xornada consecutiva na que ningún distrito sanitario supera a cifra de 30 diagnósticos diarios. De feito, Lugo (3), Ferrol (3), Santiago (5) e Ourense (5) non chegan nin á media ducia.

En Ourense (3) e Ferrol (7) xa quedan menos de 10 enfermos críticos. Ferrol logrou renovar as cirurxías habituais, suspendidas en vésperas do colapso da súa UCI. Máis detalle da evolución a nivel municipal e de área sanitaria nuns minutos en Galiciapress.