Un brote case un ano despois do inicio da pandemia forza a intervención da residencia Quercus de Leiro

Máis do 80 por cento dos anciáns deron positivo. A empresa xestora da residencia tamén é a titular dun centro de día no mesmo municipio. 

A Xunta interveu a residencia Quercus do municipio ourensán de Leiro, que acumula 68 usuarios contaxiados e outros 15 traballadores con enfermidade activa.

A decisión da Administración autonómica adóptase tras o incremento de casos rexistrado nas últimas horas, que pasaron de 27 a 68 residentes con coronavirus en só 24 horas.

Segundo datos de o Rexistro Único de Entidades Prestadoras de Servizos Sociais , o centro ten un máximo de 82 prazas. Iso implica que se contaxiaron, aproximadamente, o 83% dos anciáns. 

A residencia está xestionada pola empresa GESMEDICAL -DIS SL , unha  empresa con sede social no Carballiño. A empresa tamén opera un centro de día en Leiro.

Deste xeito, as consellerías de Sanidade e Política Social asumen a xestión do centro para "garantir a calidade asistencial" e "a correcta protección" de usuarios e traballadores.

Así as cousas, un equipo de Política Social atópase desde a mañá deste venres na residencia para realizar un seguimento permanente dos residentes e velar pola correcta aplicación das medidas preventivas. Pola súa banda, os profesionais do Sergas vixiarán a prestación da atención sanitaria precisa.

Con estes datos e a falta de coñecer o balance diario de casos nas residencias de maiores, a residencia Quercus atópase entre os xeriátricos máis afectados pola pandemia e súmase a outros centros xa intervidos pola administración.