Caída dos positivos á vez que o SERGAS recorta as PCRs de coronavirus en Galicia

As cifras do coronavirus en Galicia aparentan ser boas. Aparentan só, porque poden ser enganosas. Os 350 casos confirmados onte é a mellor cifra case nun mes. Con todo, son produto de só 4.343 test, case 3.000 menos das que vén facendo o SERGAS. O resultado é que a taxa de positividade sobe, resulta máis difícil interpretar os datos e avívase a polémica da prohibición aos médicos de familia de solicitar PCRs aos contactos estreitos.

As PCR realizadas aumentaron a 756.759, o que implica 4.343 máis. De acordo á media móbil a sete días que a diario actualiza Galiciapress, o SERGAS está a facer de media 7.205 probas. É dicir, onte completou 2.862 menos do habitual, case un 40% menos.

Facer menos probas implica máis posibilidades de obter menos positivos e que, en consecuencia, suba a taxa de positividade. Estes días roldaba o 7%, onte subiu ata o 8%.

Hai que lembrar que a taxa de positividade é unha indicador clave para saber se se está controlando un foco. Non chega con reducir os diagnósticos, hai que tratar que a positividade sexa inferior ao 5%, o límite que indica a OMS para poder considerar que un foco está en vías de control.

A notable caída de de PCRs destes días chega nun momento polémico. A semana pasada transcendió que o SERGAS manda aos médicos de familia non encargar PCRs aos contactos estreitos dos seus pacientes. Este labor débea facer o Centro de Seguimento de Contactos, os 'telerastreadores', di a Xunta para evitar duplicidades. O problema é que o CSC ten un funcionamento opaco, é unha contrata ao grupo empresarial Konecta e son xa varias as denuncias de traballadores e médicos sobre o seu mal funcionamento.

TEN SENTIDO BAIXAR Os POSITIVOS FACENDO MENOS TEST?

Con todos estes elementos sobre a mesa, é difícil estar 100% seguro de que a melloría destes días na cantidade de diagnósticos sexa do todo real e non estea influída pola caída do número de test. 

En beneficio do SERGAS hai que recoñecer que en outubro, cando se disparou a pandemia, reaccionou multiplicando os PCRs. Ademais, no fondo baixar artificialmente o número de test non ten sentido a medio prazo, pois as cifras de hospitalizados e falecementos acabarán disparándose se non se controlan os contagios, e esas cifras son moito máis difíciles de ocultar.

Sexa como for, os casos activos de Covid-19 seguen en descenso por terceira xornada consecutiva en Galicia, ata situarse en 9.952, que supoñen 63 menos que este luns, e baixan tamén a 383 os novos contagios, deles 350 confirmados por PCR nas últimas 24 horas, mentres que aumentan en 425 as altas con respecto a este luns.

Con estas cifras de positivos, é normal que as incidencias  acumuladas baixen moito. Agora hai 147 diagnósticos por 100.000 habitantes cada semana, a mellor cifra desde o 25 de outubro. Este indicador leva caendo desde principio de mes. 

A incidencia acumulada a 14 días leva caendo só cinco xornadas, o que nos lembra o recente e, por tanto feble, da recente melloría. Está en 316 diagnósticos por cada 100.000 galegos cada dúas semanas, a penas 20 positivos menos que o 5 de novembro. A Xunta dixo que non consideraría relaxar as restricións, como xa piden algúns concellos -por exemplo, Moinforte- ata baixar a 200. O obxectivo último de Moncloa é baixar a 50. 

DATOS POR ÁREAS SANITARIAS

Os contagios confirmados por PCR nas últimas 24 horas ascenden a 116 na área sanitaria de Vigo; a 66 na da Coruña; 42 na de Lugo; 41 na de Pontevedra; 34 na de Ourense; 31 na de Santiago; e 20 na de Ferrol.

En canto a os casos activos de coronavirus, descenden en todas as áreas sanitarias galegas salvo nas da Coruña e Cee, na que aumentan a 1.898 --11 máis que este luns-- e na de Lugo, que rexistra 1.148 --32 máis--.

Por contra, baixan os casos activos de Covid-19 nas áreas de Vigo, que conta con 2.455 --14 menos--; na de Pontevedra e O Salnés a 1.247 --sete menos--; a 1.170 na de Santiago e Barbanza --39 menos--; 1.021 na de Ourense --14 menos-- e 1.013 na de Ferrol --32 menos--. 

En total, hai 63 enfermos menos en toda Galicia. É o terceiro día consecutivo que sucedo isto. Non se vía algo así desde finais de verán, cando o país empezou a frear os rebrotes vacacionais. A media da variación de enfermos é do 0,9%. De seguir así, a finais de semana ou antes poderase afirmar que de media en Galicia estamos a contar menos positivos que curacións. 

SEGUEN SUBINDO Os HOSPITALIZADOS

Os pacientes con Covid-19 ingresados en hospitais de Galicia aumentaron en catro ata os 609, deles 95 permanecen en Unidade de Coidados Intensivos --un máis que este luns--.   

Os enfermos con coronavirus ocupan aproximadamente o 7% das camas convencionais que di ter a Xunta. A porcentaxe de ocupación de camas duplicouse en apenas 15 días e é un dos factores que explican o recente endurecemento das restricións.

CURADOS E FALECIDOS

En canto ás persoas con Covid falecidas, aumentaron a 1.009, tras notificar Sanidade 21 mortes na tarde deste luns, que di a Xunta tamén se corresponden con vítimas da pasada fin de semana que aínda non se computaron. Entre estes 21 falecidos hai polo menos oito vinculados con residencias. En todo caso, 21 é a cifra máis alta de mortes notificadas nun día desde a traxedia de primavera.

A primeira morte computada na Comunidade na denominada 'nova normalidade' foi a dunha muller o 7 de agosto. Antes diso, Galicia encadeara case dous meses --desde o 10 de xuño-- sen decesos relacionados con a pandemia.