Pésimas noticias: segundo récord consecutivo de positivos por coronavirus e 11 falecidos nun día

Galicia non está a lograr frear o que parece unha terceira onda do covid-19. O problema de base non aparenta ser a escaseza de PCR, pois o SERGAS está a facer notablemente máis e a taxa de positividade non baixa. Vigo e Santiago son os actuais epicentros da pandemia, mentres Ourense lles a única área que experimenta un mínimo alivio nos últimos días.

Os positivos por Covid-19 detectados en Galicia nas últimas 24 horas por PCR volveron a repuntar tras sumar outros 461 --o que supón 20 máis que a xornada anterior--.

As áreas con máis diagnósticos volven ser Vigo e Santiago.  Deses 461 en toda Galicia, 111 corresponden ao área sanitaria de Vigo e 78 á de Santiago e Barbanza.

Así se reflicte nos datos publicados na mañá deste xoves na web do Sergas con rexistros ata as 18,00 horas deste mércores, recollidos por Europa Press, nos que se indica que en Ourense houbo 76 novos positivos por PCR confirmada nas últimas 24 horas; 65 na área da Coruña e Cee; 50 na de Pontevedra e O Salnés; 46 na de Lugo e 35 na de Ferrol.

TENDENCIA Á alza
Os casos activos tamén se incrementaron ata os 5.675, o que supón 218 máis con respecto aos datos deste mércores.  En termos porcentuais, supón unha subida do 4%, levemente mellor que o 4,6% de onte. En todo caso, a media móbil a sete días indícanos un crecemento do 3,2%. O coronavirus non aceleraba tanto desde o 4 de setembro e a tendencia segue, desgraciadamente, á alza. 

Aceleración que tamén se deixa ver nos niveis de alerta.  O número de municipios galegos no nivel máximo de alerta, o tres, pola incidencia do coronavirus na última semana elevouse a 24, tres máis que o mércores, ao activarse o aviso en Teo, Monforte, Nigrán e O Porriño e pasar a laranxa Culleredo. 

Ata que punto é grave a situación?  O é e moito, segundo despréndese da análise dos diferentes indicadores que nos mostran as tendencias máis aló das cifras dun día.

Por exemplo, a incidencia acumulada dispárase por primeira vez por encima dos 100 casos por 100.000 habitantes á semana. O pasado mércores estaba en 79. É dicir, nunha semana incrementouse máis do 30%.

A incidencia acumulada a 14 días tamén está en cifras récord, 186 diagnósticos por 100.000 galegos cada dúas semanas. Unha das poucas boas noticia estatísticas é que a incidencia acumulada a dúas semanas é máis do dobre que a dunha semana, esta razón de taxas indícanos que o virus creceu algo máis lento na última semana.

Débense estas malas cifras a que o SERGAS faga máis test? De ningunha maneira.  Sanidade está a facer un 6.200 test ao día. A media de test diarios crece, é certo, pero a taxa de positividade non descende. A media anda agora polo 5,6% de test positivos. 

Aínda que sobe, a taxa de positividade non se está disparando como outros indicadores. Isto indica que  a raíz do problema non é tanto a escaseza de PCRs, se non a abundancia de positivos. Por algún motivo, Galicia non está a lograr romper as cadeas de transmisión.  

SERIOS PROBLEMAS EN VIGO E SANTIAGO

Soben en todas as áreas sanitarias salvo na de Ourense, onde volven descender lixeiramente en cinco e sitúanse en 1.489.  O número de municipios galegos no nivel máximo de alerta, o tres, pola incidencia do coronavirus na última semana elevouse a 24, tres máis que o mércores, ao activarse o aviso en Teo, Monforte, Nigrán e O Porriño e pasar a laranxa Culleredo.

Mentres, o maior incremento de casos activos corresponde á área de Vigo, con 95 máis ata os 995; seguida de Santiago, cunha subida de 40 ata os 891; 32 máis en Ferrol, que conta con 283; 26 na de Pontevedra e O Salnés que se sitúa en 564; outros 24 máis na de Lugo ata os 542; e seis na de A Coruña e Cee, que ten 911.

En Galicia curáronse ata o momento 24.255 persoas, o que supón 243 máis que as rexistradas ata este mércores. E realizáronse un total de 609.516 PCR e 391.246 probas serológicas.

RÉCORD DE VÍTIMAS NUN DÍA DESDE A PRIMEIRA ONDA
Ata a data faleceron en Galicia 847 persoas. As últimas 11 vítimas foron notificadas na tarde deste mércores, seis delas procedentes da residencia Vos Gozos de Pereiro de Aguiar (Ourense).

En concreto, os últimas falecidos foron unha muller de 87 anos ingresada no Complexo Hospitalario da Coruña, unha muller de 85 ingresada no Complexo Hospitalario de Ferrol e unha muller de 88 anos ingresada no Clínico de Santiago.

Así mesmo, morreron unha muller de 77 anos e un home de 94 que se atopaban ingresados no Hospital de Verín (Ourense) e tres mulleres --de 99, 90 e 82 anos-- que estaban no Complexo Hospitalario de Ourense. As tres últimas vítimas procedían da residencia Vos Gozos, de Pereiro de Aguiar.

A maiores, nesta mesma residencia ourensá rexistráronse tres novos falecementos, os de dúas mulleres de 92 e 87 anos e o dun home de 89 anos.

Este número de vítimas --11 nunha xornada-- é dos máis altos que comunicou Galicia en nova normalidade. En concreto, o pasado 13 de outubro, hai pouco máis dunha semana, Sanidade tamén comunicou 11 falecidos, a cifra máis alta rexistrada na Comunidade desde o 26 de abril, cando morreron 15 persoas en relación á covid-19.

Afortunadamente, por agora o ritmo de decesos é moito menos brusco que a traxedia sufrida na primavera: