Desaloxan parte do Hospital de Conxo tras un incendio nas instalacións

Centos de persoas tiveron que ser desaloxadas en menos de cinco minutos polo incendio, probablemente nun almacén de roupa, no hospital público. Non houbo danos persoais aínda que algúns afectados sufriron molestias polo fume.

Un lume orixinado nas instalacións do Hospital de Conxo, de Santiago de Compostela, obrigou a desaloxar parte do inmoble, concretamente na zona de consultas externas preto da entrada principal.

Desaloxo de o Hospital de Conxo nunha imaxe da CRTVG

O incendio rexistrouse nun almacén de roupa nun dos pisos inferiores do edificio. Os traballadores do control de seguridade do Complexo Hospitalario Universitario de Santiago alertaron sobre as 11,30 horas de que detectaran a presenza de fume a través do sistema de vídeo vixilancia e solicitaban a mobilización de medios de emerxencia para que comprobasen a orixe.

O Centro Integrado de Atención ás Emerxencias de Galicia deu aviso aos Bombeiros de Santiago e da Agrupación de Protección Civil. Para garantir as condicións de seguridade nas vías de acceso ao edificio, solicitouse tamén a colaboración dos axentes da Policía Nacional e Local.

Finalmente, o lume foi sufocado coa axuda dos membros dos equipos de extinción e non houbo que lamentar danos persoais, aínda que a situación obrigou a desaloxar a parte das persoas que se atopaban alí como medida preventiva.