​Birutis fai esquecer a Kravic co MVP da xornada

O xogador lituano, recentemente chegado ao equipo de Moncho Fernández, fixo as delicias dos galegos cunha sensacional actuación no seu debut.

Birutis dominou a pintura ante Fuenlabrada | Foto: Obradoiro

Larynas Birutis, flamante fichaxe do Obradoiro, só necesitou unha xornada para demostrar a propios e estraños que está na ACB para deixar pegada. Cunha espectacular actuación ante o Fuenlabrada o lituano erixiuse como a figura da estrea do campionato español, que lidera, momentaneamente, o conxunto compostelán despois da súa sensacional vitoria 101-82.

E é que o triunfou cultivouse nas mans do pivote báltico autor dun sensacional dobre-dobre de 27 puntos e 12 rebotes. Con eses números e un 42 de valoración impúxose sobre o resto de xogadores da liga no seu debut. Sobresae especialmente a súa fiabilidade nos tiros, anotando 9 de 11 intentos de dous e 9 dos seus 10 tiros libres.

Con todo, talvez o mellor valor de Birutis fose a súa capacidade para dobrarse tanto en ataque como en defensa. Boa proba diso son os seis rebotes atrapados nos dous lados da pista. O seu sacrificio nos dous postes axuda a cubrir o oco que deixou este verán Deixan Kravic coa súa saída a San Pablo Burgos.

O serbio, un dos alicerces dos santiagueses a tempada pasada, é unha das baixas máis importantes do Obra este verán, xunto a Magee, Brodziansky e Vasileiadis. Con todo, parece que a posición de pivote ten un novo dono, que promete dominar a liga española e dar moito xogo no Fontes do Sar.