​O Valencia está a piques de torpedear a fichaxe de Murillo polo Celta

O central cafeteiro foi visto na capital do Turia segundo medios locais, que apuntan a un regreso do defensor a Mestalla.

Parece que o futuro de Jeison Murillo está cada vez máis lonxe da ría de Vigo. A pesar da vontade do defensor de volver engrosar as filas do equipo de Óscar García, as diferenzas económicas entre o que ofrecía o Celta de Vigo (unha cesión con opción de compra obrigatoria) e as pretensións da Sampdoria parecen terminar por decantar a balanza en favor do Valencia CF, equipo que xa contou cos servizos do colombiano e que está preto de pechar a súa reincorporación.

O club che, necesitado de fichaxes, ve en Murillo unha solución inmediata aos seus problemas na retagarda. A pesar de que algúns medios locais apuntan a que a súa presenza na cidade é só por motivos persoais, o certo é que o xogador podería cansarse de esperar polo acordo entre os celestes e o cadro xenovés, polo que a súa estancia en Valencia ben pode estar estreitamente ligada ao seu futuro profesional.

Doutra banda, esta posibilidade parece abrirse despois de que en Arxentina afirmen que a contratación de Martínez Quarta ao Celta parece moi encarrilada. O defensa de River Plate chegaría a Vigo e pecharía as portas a Murillo, a non ser que finalmente Araújo termine por abandonar a disciplina celtiña, unha posibilidade que a medida que foron pasando as semanas perdeu forza.