Brote de coronavirus no Multiusos do Sar de Santiago con 9 positivos, varios traballadores

Fontes oficiais do SERGAS acaban de confirmar un brote de coronavirus no Multiusos do Sar. É preocupante non tanto polo número de afectados, que por agora son 9, como polo feito de que o pavillón é un dos recintos pechados máis concorridos de Santiago de Compostela. 

Imaxe de arquivo do Multiusos, unha foto de Xosema baixo Creative Commons Attribution-Share Alike 4.0 International

Segundo fontes próximas aos traballadores, os operarios tiveron noticia dos primeiros positivos, tres, nas últimas horas. Consultadas fontes do Concello por esta redacción, inicialmente só  tiña constancia do positivo dun traballador, polo que parece que recentemente máis probas deron positivo.

Hai que lembrar que Santiago de Compostela é unha das áreas, xunto Lugo, onde máis está a crecer o COVID-19 na actualidade. Ata o de agora, o brote de Santa Comba era o principal motor deste ascenso.

Segundo indicaron  fontes oficiais de XADE a Galiciapress, o problema está focalizado nunha das "actividades dirixidas", é dicir un dos deportes con monitor.

As mesmas fontes da empresa que xestiona o Multiusos, as piscinas do Sar e Santa Isabel evitan por agora concretar se os positivos son todos traballadores ou usuarios.  Tampouco o SERGAS facilitou por agora ese detalle. Segundo fontes próximas aos traballadores, son polo menos tres os operarios contaxiados.

Desde XADE explícase a que o primeiro positivo saltou o domingo. Inmediatamente facilitaron ao SERGAS unha lista de contactos próximos, suponse que ou alumnos ou compañeiros do positivo, e agora están a saltar novos contagios. 

A empresa xestora das instalacións públicas destaca que desde o primeiro momento do fin do estado de alarma adoptou "medidas extras". Por exemplo, se a norma fixa a distancia en 1,5 metros a distancia social en actividades grupais, o Multiusos aumentouna a máis de 2 metros en moitas das clases. Os grupos pasaron de 24 alumnos como máximo a 9.

Lamentablemente estes esforzos non evitaron que o virus se coe no recinto deportivo. 

Está por ver se saltan máis contagios. Por agora, XADE xa cancelou as clases grupais. Ademais, o domingo pola noite unha contratista desinfectó tanto o Multiusos como as piscinas e o complexo de Santa Isabel. Ese mesmo domingo a empresa informou dun "caso de COVID leve nos centros". 

Mais alá deste novo brote, as noticias hoxe en Santiago son agridoces. 

Boas noticias na fronte docente, dos 182 profesores do Barbanza convocados, 8 non se presentaron e o resto deu negativo.

O brote da Pobra de O Caramiñal, nunha conserveira, anda xa polos 19 positivos. O de Santa Comba polos 43 e o dunha reunión familiar en Negreira está en 14 casos. 

Ademais, o SERGAS está a realizar esta tarde un  segundo "screening selectivo" na residencia Volta de O Castro de Santiago a 164 anciáns e traballadores. Por agora entre os traballadores só hai un positivo confirmado, pero fontes sindicais aseguran que hai persoas maiores con síntomas.