A "pestilencia" que emana do depósito "incontrolado" de residuos na canteira de Touro motiva a denuncia do BNG

|

O BNG denunciou este venres que a "nefasta" xestión de residuos que fai a empresa Tratamentos Ecolóxicos do Noroeste na antiga canteira de Touro (A Coruña) leva a un depósito "incontrolado" de lixos e a un problema recorrente de "pestilencia" que afecta "á calidade de vida e á saúde" dos veciños.


O portavoz do BNG en Touro, Xoán Louzao, fala sobre a xestión de residuos na mina de Touro acompañado do portavoz de Medio Rural do BNG, Xosé Luís Rivas 'Mini', e a deputada Iria Carreira.
Así o manifestou nunha rolda de prensa o portavoz do BNG no municipio, Xoán Louzao, que explicou que a empresa conta desde 2015 cunha autorización para xestionar residuos urbanos e industriais non perigosos. "O que non ten é autorización para tirar os residuos pola canteira", sinalou.

Este problema de contaminación odorífera, agregou, quedou "tapado" polos plans para retomar a actividade da mina en Touro e O Pino e as protestas en contra deste proxecto, rexeitado finalmente pola Xunta por non garantir a sustentabilidade ambiental. Con todo, dixo Louzao, agora ao problema da contaminación mineira na zona únese o do mal cheiro.

De acordo co portavoz da formación nacionalista en Touro, considérase que existe contaminación odorífera cando se dan episodios que superan os 27 minutos e, segundo os datos da propia empresa, constan algúns dun ou dous días, manifestou e agregou que documentos internos da compañía admiten que é necesario mellorar en materia de cheiro.

O portavoz de Medio Rural do BNG, Xosé Luís Rivas 'Mini', afirmou que se está facendo unha xestión dos residuos "neglixente" e "coa conivencia clara da Consellería porque hai intereses espurios". Na zona, dixo, entran diferentes tipos de refugallos e atopáronse bacterias "que viven en situacións extremas de acidez".

"Falamos de cousas demasiado serias. Entran todo tipo de camións", sinalou e pediu que non pague esta comarca "os pratos rotos" da xestión de residuos galega. Neste sentido, Louzao engadiu que se descoñece publicamente que residuos entran nas instalacións e a cantidade dos mesmos.

Ante este problema, criticou que o Concello "acepta" que existe, pero "non dá solucións", mentres que a Xunta "mira para outro lado" e, na última visita ao lugar, a finais de 2019, manifestou que se cumprían as normas e que "non cheiraba". O novo Goberno, reclamou, "ten que tomar cartas no asunto".

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress