(VÍDEOS) Ourense pendente do incendio de Cualedro que en menos de 24h xa arrasou máis de 1.000 hectáreas

Ourense arde e o lume é unha ameaza para os veciños das localidades afectadas. Varias persoas tiveron que ser desaloxadas das súas casas pola proximidade das chamas.

Nestes momentos, a pesar de que o lume segue sen control e é o maior da tempada superando o de Monterrei -aínda activo e con 720 hectáreas queimadas segundo a última estimación-, desde Medio Rural trasladan que, aínda que se atopan no lugar membros da Unidade Militar de Emerxencias, por agora o lume non ameaza ningún núcleo de poboación. 

O incendio de Cualedro (Ourense), que obrigou a declarar Situación 2 e a desaloxar a varios veciños por ameaza das súas casas no municipio veciño de Monterrei --parroquia de San Cristovo--, segue sen control na mañá deste xoves tras converterse no peor do ano e arrasar un milleiro de hectáreas.

Segundo a Consellería do Medio Rural no seu boletín sobre a situación dos incendios ás 9,00 horas, "non hai perigo para ningún núcleo de poboación", aínda que permanece activada como medida preventiva a Situación 2.

O lume iniciouse o mércores ás 14,15 horas na parroquia de San Millao, en Cualedro, e continúa activo este xoves, aínda que "evoluciona favorablemente", segundo este departamento.

Este gran incendio --a partir de 500 hectáreas-- afectou tamén a terreos agrícolas e a viñas. Polo momento, mobilizou a 12 avións, 11 helicópteros, 17 motobombas, 51 brigadas, 17 axentes e un técnico. Tamén colaboran efectivos da Unidade Militar de Emerxencias (UME).

Ademais, segundo fontes das brigadas, a intensa calor provocou que un dos bombeiros forestais de Laza que loitan contra as chamas tivese que ser evacuado en ambulancia a un centro hospitalario, aínda que o seu estado, nun principio, non é preocupante.

Por outra banda, outro incendio en Monterrei (Ourense) permanece controlado desde o mércores, tras iniciarse o pasado venres na parroquia de Flariz. A superficie queimada é de 720 hectáreas, aínda que a Xunta non o identifica como gran incendio forestal dado que as hectáreas queimadas forestais son 450 e as 270 hectáreas restantes son agrícolas. Entre outros medios, participaron 12 avións e 9 helicópteros, así como a UME.