(VÍDEO) ​González Laya aprema ao Reino Unido para que defina as súas relacións coa Unión Europea antes de Fin de Ano: "O reloxo segue correndo"

A ministra de Exteriores, González Laya, referiuse ao pacto alcanzado este martes polos 27, que supón un impulso económico sen precedentes aos países máis golpeados pola crise sanitaria e económica que arrasa a media Europa.

Galiciapress consultou á ministra polas sensacións que lle esperta este acordo histórico, que hai uns días anunciou como un "momento refundacional" da UE. Nese contexto, o Brexit, un dos elementos que causan esa refundación, tamén obriga a Bruxelas a meter présa a Londres para que decida dunha vez por todas que papel quere xogar na Europa do futuro.

González Laya respondeu as consultas de Galiciapress

Durante as negociacións González Laya aventurou que un pacto deste calado podería supoñer "un momento refundacional" na Unión Europea, especialmente neste contexto, onde o continente está acosado por unha profunda crise sanitaria e económica. A pesar deste escenario tan desfavorable, o acordo finalmente tivo lugar este martes e pode significar unha nova etapa no referido ás relacións entre os membros da UE.

A ministra de Exteriores considerou que esa refundación vén ademais motivada por "catro grandes placas tectónicas que se están movendo e ás que a Unión Europea tenlles que dar unha resposta. Respecto diso, González Laya referiuse ao Brexit como un dos catro grandes cambios, xunto con "un gran conflito xeopolítico entre China e Estados Unidos", o "durísimo efecto" que a pandemia está a ter sobre a sociedade e a economía europea e mundial e a "transformación dixital e a descarbonización que están a cambiar o mercado laboral e a esencia das nosas economías".

"Isto é ao que a UE deu unha resposta co fondo de recuperación e co orzamento", razoou González Laya. Nese sentido, considera que non hai que poñer unicamente en valor "os miles de millóns que se mobilizaron", senón tamén "a vontade que hai detrás desa mobilización histórica de recursos financeiros para atender a estes catro grandes movementos".

BREXIT: O GRAN PUNTO NEGRO

Con todo, talvez o punto máis quente dentro da Unión parece seguir sendo o papel do Reino Unido. Cuestionada sobre se nesta reformulación que propón de Europa pode ter un oco para os británicos, aínda que isto signifique tender pontes paralelas á Unión, a ministra foi tallante ao replicar que esa é unha cuestión da que só o Reino Unido pode dar forma: "O balón está no seu campo".

"Teñen que decidir que tipo de relación queren coa UE, xa que esta foi bastante clara", afirmou a titular de Exteriores, ao considerar que Europa "quere unha relación o máis estreita posible", aínda que iso signifique que esa relación "non pode ser igual que cando un estado é membro".

"A resposta a esa pregunta, que Europa xa ofreceu , necesita dunha resposta por parte do Reino Unido. Resposta que estamos a esperar impacientemente porque o reloxo segue correndo e a data para a cal necesitamos unha resposta é o 31 de decembro deste 2020 que é cando termina o período de transición do Brexit", indicou a ministra, que estará no Campo de Xibraltar esta semana para escoitar a todos os actores implicados para integrar "as súas preocupacións e necesidades" na estratexia negociadora de España co Reino Unido.

GALICIA E O BREXIT

Unha estratexia negociadora na que, doutra banda, Galicia ten moito que dicir, xa que o sector pesqueiro está moi pendente dos acordos que se alcancen entre os dous países, así como os que poidan alcanzar Londres e Bruxelas, xa que a pesca é aínda a día de hoxe un da grandes tira e afrouxa entre os negociadores.

O eurodeputado popular Millán Mon advertiu recentemente que "a relación económica futura co Reino Unido non debe contemplarse sen que estea acompañada dun acordo específico sobre o acceso recíproco a augas e recursos". Na mesma liña, hai apenas un mes asinouse a segunda declaración en favor das comunidades pesqueiras ao redor deste marco negociador. Un documento que, entre outros, conta coa rúbrica do presidente da Xunta, Alberto Núñez Feijóo, e que trata de ser un impulso para que os dous bloques logren un consenso.