Ataque grupal contra policías (vídeos) nun control da corentena deixa dous axentes feridos en O Vao, Poio

Machadas e paus foron utilizados por algúns habitantes de O Vao, un poboado con problemas de tráfico de drogas, para atacar aos axentes tras o arrestro dun reicidente en saltarse o confinamento, segundo a versión policial. O Concello de Poio informa que hai 8 identificados para "a súa posterior detención".

Segundo fontes das forzas de seguridade consultadas por Galiciapress, a orixe do conflito foi o lanzamento dunha pedra a un coche da USECI de Garda Civil de Vigo  cando estaban a poñer unha multa. Os gardas civís saíron detrás do agresor e detivérono. Lograron metelo no coche e saír do poboado tras recibir máis pedradas no vehículo. 

Corenta e cinco minutos despois o 112 recibiu unha chamada alertando dunha suposta pelexa en O Vao. Ao chamar ao 112, os denunciantes lograron que os primeiros en chegar fosen axentes da Policía Local, que nada sabían do incidente previo. "Segundo entrou a patrulla, estaban a esperar uns rapaces e rebentáronlle o coche a pedradas", indican as citadas fontes. Os axentes escaparon con feridas por cortes de cristais. Posteriormente chegaron os reforzos da Garda Civil e a Policía Local.

Este é o vídeo conseguido por Galiciapress da parte final do incidente onde a Garda Civil tenta tranquilizar os ánimos a pesar de que hai persoas que os ameazan con paus:

O resultado é que dous axentes da Policía Local de Poio (Pontevedra) foron atendidos nun centro hospitalario, tras ser vítimas do ataque realizado por un grupo dunhas 20 persoas no poboado de O Vao de Arriba. Ambos presentan contusións, mazaduras e diversos cortes, resume Europa Press.

Segundo informaron fontes da Xefatura da Policía Local de Poio, os feitos tiveron lugar este luns, ao redor das 20,30 horas.

Unha patrulla da Garda Civil estaba a realizar un control de mobilidade con motivo do estado de alarma decretado pola pandemia do COVID-19, cando déronlle o alto a un home xa coñecido polos axentes do instituto armado pola súa reincidencia en saltarse o confinamento.

A parte final do conflito pódese ver neste vídeo publicado por Aurousa Si Radio:

VERSIÓN DA GARDA CIVIL

Cando os axentes da Garda Civil procedían á súa detención, un grupo de persoas reaccionou a pedradas contra o coche patrulla. Foi entón cando un coche do corpo de seguridade municipal chegou á zona, despois de ser avisado polo 112, e recibiu o impacto de varias pedras.

Posteriormente, estes mesmos individuos atacaron os automóbiles con paus, provocando cuantiosos danos materiais.

Os dous axentes municipais lograron abandonar o vehículo e tiveron que esperar aos reforzos fose do poboado. Entón acudiron máis efectivos da Garda Civil, e tamén axentes da Policía Nacional e a Policía Local de Pontevedra.

A Policía Local de Poio denuncia que os seus axentes foron recibidos "con paus e machadas" por un grupo "esnaquizando o vehículo policial e ferindo a dous compañeiros".

O corpo confirmou a detención dun dos presuntos responsables deste ataque contra as forzas da orde. As dilixencias continúan abertas ata que se identifique ao resto de persoas implicadas nestes disturbios.

Segundo o concello, xa hai oito identificados. Os axentes pasaron polo Hospital de Pontevedra, pero xa están na casa recuperándose, di o municipio.