​Naturgy e os seus empregados doan máis dun millón de euros á loita da Cruz Vermella contra o coronavirus

A contía procede das doazóns do persoal e as achegas da propia empresa, que acumularon un total de 1,1 millóns de euros, que serán empregados na compra de equipamento sanitario e aos proxectos da organización humanitaria.

“O importe destinarase integramente á adquisición de equipos de protección individual e respiradores volumétricos con material funxible, que se cederán a centros sanitarios de España”, subliña a compañía no seu comunicado

“A gran resposta dos nosos empregados demostra a solidariedade de todas e cada unha das persoas que forman o noso equipo, e o seu compromiso con toda a sociedade, máis aló do que xa están a demostrar para asegurar un servizo básico como o enerxético, con elevados niveis de calidade a pesar da complicada situación que estamos a vivir”, destacou Francisco Reynés, presidente de Naturgy.

OUTROS COMPROMISOS

O compromiso de Naturgy e os seus traballadores con Cruz Vermella –un compromiso que no caso da Fundación Naturgy xa vén de lonxe polos diversos proxectos conxuntos vinculados ao Plan de Vulnerabilidade da compañía– reforza as medidas que foron adoptando desde a enerxética ante a crise sanitaria, económica e social provocada polo coronavirus.

Entre eles destaca a iniciativa ‘A túa Idea Suma’, un proxecto exposto polos propios empregados e que busca responder a esta emerxencia sanitaria. Ademais, a cesión de camas para hospitais ou a fabricación de material protector para os profesionais que se atopan en primeira liña da loita contra o coronavirus son outros dos campos de actuación de Naturgy.

Doutra banda, a enerxética puxo en marcha semanas atrás diversos plans para axudar aos seus clientes, xa sexan domésticos, pemes ou autónomos, ante esta crise. Desta forma, casi 30.000 clientes beneficiáronse do aprazamento do pago de facturas ou do servizo de teleasistencia médica gratuíto facilitado pola compañía.

Ademais, neste tempo hospitais de emerxencia e hoteis medicalizados están a recibir enerxía gratis de Naturgy, que realizou 11.500 reparacións de emerxencia durante o estado de alarma.