O SERGAS só fai test aos sanitarios con síntomas, protesta CIG-Saúde
CIG-Saúde demanda, ademais dos equipos individuais de protección necesarios, que se lles faga a proba do coronavirus COVID-19 "a todo o persoal" do Sergas, non só aos que presentan síntomas, co fin de "proporcionar máis protección".
A pesar de que hai casos asintomáticos, que os sanitarios están en primeira liña e traballan coas persoas máis vulnerables
Así o sinalou esta central sindical nun comunicado de prensa, no que incide en que con esta medida, que "conta co aval científico", puntualiza, pódese "proporcionar un grao adicional de protección e evitar contagios".
PRIMEIRO, OS QUE MÁIS RISCO SOFREN
A secretaria nacional de CIG-Saúde, María Xosé Abuín, lembra que o persoal con vínculo no Sergas e o das empresas que traballan en centros sanitarios, polo da limpeza, "están a facer todo o que se pode, e máis, por prestar a atención sanitaria necesaria a toda a poboación"."Ese é o noso traballo e temos a determinación de facelo o mellor posible, coa maior eficacia e coa vontade de atender todas as demandas posibles da poboación", subliñou Abuín no comunicado, no que matiza que o que demandan "é poder facer o traballo nas condicións de seguridade necesarias", responsabilidade que, apostila a CIG, "recae na dirección das distintas áreas sanitarias".
Por iso, CIG-Saúde solicita "que se proceda a realizar, cunha prelación en función do risco, unha determinación en plasma de inmunoglobulinas IgM e IgG a todo a persoal da área sanitaria en risco".
Este sindicato asegura que "non se están facendo os test PCR a todo o persoal". "Fanse só se hai síntomas respiratorios", explicou María Xosé Abuín, que lembra que o persoal sanitario "é o que está en contacto coa poboación máis vulnerable" polo que, abundou, "é necesario asegurar que non sexan axente de transmisión da infección".
Escribe o teu comentario