Veciños que axudan aos seus veciños contra o illamento polo coronavirus

A crise sanitaria provocada polo Covid-19 alimenta iniciativas solidarias en Santiago de Compostela. Grupos de voluntarios axudan a  persoas maiores ou  grupos de risco que teñen problemas para saír a comprar ou desprazarse a centros de saúde.

Os voluntarios ofrecen axuda para facer a compra ou acudir ás farmacias a por medicamentos

Este luns 16 de marzo é o primeiro día laboral tras decretarse o estado de alarma e trae consigo unha serie de interrogantes que necesitan dunha importante resposta cidadá para poder resolver cuestións fundamentais como abastecer de alimentos a todas aquelas persoas que viven soas e que, polo confinamento, atópanse nunha situación de especial vulnerabilidade.

En Santiago de Compostela grupos de asociacións veciñais puxéronse ao choio para que estas persoas reciban a axuda que necesitan canto antes e non deixar de lado a ninguén nestes momentos tan complicados. Só en Santiago de Compostela, o alcalde Sánchez Bugallo cifrou o pasado xoves en máis de 4.000 o número de maiores de 65 anos que viven sós na capital galega.  

É neste plano onde a Asociación Veciñal As Marías, da zona de Espírito Santo e Basquiños, ofreceuse para axudar a todas esas persoas maiores e grupos de risco para realizar labores como ir á compra ou a por medicamentos ás farmacias. Os voluntarios aprovisionarán co reclamo ‘Precisas algo?’ a todos aqueles que necesiten deste servizo durante o confinamento.

‘AXUDOCHE?’

Un proxecto similar ao que se desenvolve non moi lonxe de alí, no Ensanche, onde a Asociación Veciñal Raigame, co lema ‘Axúdoche?’ busca ser a solución para todos aqueles que se atopan nunha situación de desamparo similar. Todas as persoas do contorno que por diversos motivos teñan problemas á hora de moverse do seu domicilio son ás que pretende socorrer Raigame con esta iniciativa.

A iniciativa, ademais, terá un impacto especial tamén sobre o comercio local. “Busca aflorar a solidariedade entre todos os veciños, mesmo co comercio local, porque agora ponse en evidencia a necesidade en grao sumo próximo para evitar desprazamentos”, afirmou o presidente da Asociación, Xosé Manuel Durán, durante unha entrevista para a Cadea Ser.

“Temos 50 veciños repartidos por toda a cidade, a maioría pola Zona Nova”, explicou Durán, aínda que precisou que este tipo de axuda solicitouse en toda a capital galega, aínda que sen dar unha cifra concreta. “A estratexia é poñer un cartel no portal de cada un de nós -onde figura o nome, o número e o piso da persoa voluntaria-  e ofrecer facer a compra no comercio local da mesma rúa ou ir á farmacia do barrio, así como xestionar o transporte a un centro médico, sacar o lixo, solucionar dúbidas ou mesmo conversar por vía telefónica”.

Doutra banda, Durán recalcou a importancia de seguir as recomendacións sanitarias e gardar unha distancia de seguridade para evitar posibles contagios. “No grupo hai médicos do Centro de saúde Concepción Arenal que son os que nos asesoran”, subliñou.

Con todo, a iniciativa non é unha consecuencia directa do coronavirus, senón que como comentou Durán é un proxecto que viña de tempo atrás e que estaba programado para arrincar de forma definitiva nun futuro inmediato, aínda que a crise sanitaria provocada polo coronavirus obrigou á Asociación para poñer en funcionamento o sistema de forma abrupta.

Para aqueles que se queiran ofrecer como voluntarios só ten que escribir ao mail aavvraigame@gmail.com dando o seu nome, domicilio e teléfono de contacto, mentres que as persoas que desexen solicitar un servizo poden contactar coa asociación a través do 698 190 793.