Galicia sen vodas, sen misas...celebracións relixiosas canceladas ata despois da Semana Santa

Os bispos da Provincia Eclesiástica de Santiago de Compostela acordaron este venres dispensar aos fieis da asistencia ás misas e eucaristías e instan a seguilas "por radio ou televisión, así como por Internet" para frear a expansión do novo coronavirus. Esta e outras medidas serán "temporais" e "estarán en vigor en principio ata despois de Semana Santa".

A través dun comunicado asinado por todos eles tras unha reunión mantida este venres na capital galega, os bispos da Comunidade apelan á "responsabilidade cidadá" e ao "amor ao próximo" para que os cristiáns sigan as recomendacións do Ministerio de Sanidade e a Consellería de Sanidade fronte ao Covid-19, xa declarado pandemia.

Así, a Iglesia decide suspender as celebracións comunitarias e públicas da misa "ata ser superada a actual situación de emerxencia". Con todo, os sacerdotes "continuarán celebrando diariamente a Eucaristía" e "un pequeno grupo de fieis" poderá seguir asistindo.

"Os templos das nosas dioceses seguirán abertos, a menos que as autoridades sanitarias digan o contrario, como signo de esperanza e ao dispor dos fieis para que poidan ir rezar, sen aglomeracións e vivir no silencio estes momentos difíciles", engaden os bispos.

FUNERAIS E OUTRAS CELEBRACIÓNS

En canto aos funerais, poderán celebrarse como exequias sen misas, que poderán ter lugar tras esta crise, ou só cos familiares máis achegados. Tamén se pospoñen ata despois de Semana Santa as celebracións de aniversarios, confirmacións, catequeses, encontros parroquiais e "calquera outra celebración que non sexa urxente".

Para o sacramento da penitencia, os bispos recomendan utilizar espazos "que permitan cumprir coas esixencias hixiénicas indicadas polas autoridades sanitarias".

Coa vista posta nos eventos da Semana Santa, aconsellan aos responsables das confrarías "que sigan tamén as orientacións das autoridades sanitarias". Así mesmo, permanecerán pechados ao público os museos, as bibliotecas e os arquivos dependentes das dioceses.

"PRUDENCIA" NA CARIDADE

Con todo, non pecharán os espazos dedicados á actividade caritativa, aínda que se convida a "extremar a prudencia na atención individualizada".

Así as cousas, os bispos lembran aos fieis que poden contactar coa súa parroquia "para calquera necesidade, especialmente para a recepción de sacramentos como, por exemplo, a penitencia ou a eucaristía".

En vista destes tempos "de desconcerto", diríxense aos cristiáns para pedirlles que "respondan con responsabilidade e a través da caridade, xerando novas formas de presenza e de coidado", particularmente "cara ás persoas soas ou abandonadas".