Pesar no teatro e o cinema galego pola morte de Pilar Pereira

|

A actriz Pilar Pereira (Santiago de Compostela, 1937), referente do teatro e do audiovisual galego, faleceu este venres, segundo informou a Asociación de Actores e Actrices de Galicia (AAAG).


A actriz Pilar Pereira

A asociación, que reúne a gran parte da profesión de interpretación e da dirección de escena, destacou que Pilar Pereira "trazou unha traxectoria vital e profesional digna de toda a admiración".

"Tanto nós, compañeiros e compañeiras do teatro, como o público botaremos de menos a unha figura imprescindible da nosa escena", sinalou a directiva da asociación, que lembra que Pilar Pereira foi galardoada en 2013 co Premio de Honra Marisa Soto na gala de Teatro María Casares.

Pilar Pereira posúe unha das carreiras máis amplas da escena galega tanto no audiovisual como no teatro. Así, durante máis de seis décadas, a actriz desenvolveu o seu traballo en Galicia, España, Francia, Bélxica e América Latina.

Entre outras accións, creou unha compañía teatral que levaba o seu nome e coa que realizou diversos espectáculos escritos por ela mesma como 'Un lunar vermello con pinguiñas azuis', que foi dirixido por Quico Cadaval. Ademais, traballou con Sarabela Teatro, Compañía Marías, Factoría Teatro, Teatro do Atlántico ou Teatro do Morcego.

No cinema, mantivo unha fructífra relación profesional co cineasta Xavier Bermúdez, co que realizou películas como Rafael, Meniña ou León e Esquecemento. Na televisión tivo papeis regulares en series populares como Mareas Vivas ou Rías Baixas. A nivel estatal, participou con personaxes episódicos en Ao choio e Hospital Central.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress