A Canuda é un "pseudozoo" onde os animais "conviven coas súas feces", denuncian animalistas

O parque de lecer inclúe nas súas 200.000 hectáreas unha pequena "aula da natureza" con ovellas, porcos, pavos reais e outros animais

A Asociación Animalista Libera criticou este domingo o estado dun "pseudozoo" do interior do Parque da Canuda, dependente do concello de Salvaterra do Miño (Pontevedra), onde os animais "conviven coas súas propias feces".

Os animalistas recalcaron nun comunicado que estas instalacións "non superarían ningunha inspección sobre parques zoológicos" e sinalaron que "non é a primeira vez" que a situación dos animais e gaiolas "son motivo de preocupación cidadá".

Nesta liña, os defensores dos animais indicaron que "é habitual" que persoas que visiten o parque "remitan imaxes á ONG sobre a falta de limpeza ou a propia calidade dos espazos".

Así mesmo, a organización reprochou ao Concello que continúen tendo esta instalación que "non achega nada positivo" e que "só serve para ver animais como porcos, ovellas ou diferentes especies de aves nun contexto de catividade extrema".

Os TEMPOS ESTÁN a CAMBIAR
Ademais, considera "surrealista" que o recinto perviva "no marco dunha lexislación europea que cada vez esixe maiores estándares de benestar animal", á vez que destacaron que a normativa sobre sanidade e benestar animal en explotacións gandeiras "esixe maiores criterios de protección para porcos e ovellas" dos que "parece prestarse neste parque público e gratuíto".

A asociación tamén explicou que a finais de 2019 solicitaron unha inspección formal das instalacións onde detectaron "diferentes carencias" e que, ante esta "reincidencia", van pedir a a súa clausura e "ofrecen a súa experiencia para posibles traslados dos animais a santuarios que poidan darlles unha vida moito máis digna".