​Brigantias, Sereas, Irmandiñas e Jabatas pelexan pola liga Galega de Roller Derby

Catro equipos pugnarán polo cordón autonómico a partir das 17 horas do 25 de xaneiro na III Edición do campionato galego de Roller Derby.

Este sábado empeza a liga | Foto: @IrmandinasRD

A Liga Galega de Roller Derby comeza esta fin de semana na pista do polideportivo Elviña con catro equipos pelexando o todo polo todo nesta III Edición do campionato galego.

Nesta primeira xornada as herculinas de As Brigantias mediranse ao conxunto olívico de Sereas Bravas, que buscarán reter o título conquistado o pasado ano, ás 17 horas. Ese encontro será o que abra a liga, xa que despois do choque mediranse as tamén coruñesas Irmandiñas contra as Jabatas ourensás.

O campionato, que se desenvolverá ao longo dos próximos meses e que naceu da iniciativa do club Coruña Roller Derby Irmandiñas e doutros clubes galegos, conta co respaldo da Federación Galega de Patinaxe.

Galicia é a comunidade con máis equipos federados, o que permite ver a crecente popularidade deste deporte estadounidense que aos poucos se foi facendo oco entre as demais actividades sobre patíns.