​O vídeo que demostra que aterrar en Lavacolla é unha profesión de risco

Un piloto filma o descenso desde o interior da cabina da súa aeronave á pista do aeroporto santiagués un de tantos días de choiva en Santiago de Compostela.

Isto é o que ve un piloto antes de chegar a Lavacolla

Que chova en Galicia xa non é noticia para case ninguén. Pero para os pilotos de avión o tempo sempre é a liña que diferencia un día máis na oficina dun de alto risco. Nunha profesión de altos voos como esta, a néboa é moitas veces o inimigo natural do piloto, que pon en xogo a súa vida e a do resto da pasaxe en case cada manobra que realiza.

Por todo isto, non é raro pensar que cada voo a Santiago de Compostela, polo menos entre os meses de van de outubro a maio, resulte todo un desafío. Un dos moitos pilotos que teñen a Lavacolla no seu roteiro habitual filmou desde a súa cabina a aterraxe na terminal compostelá nun día de néboa.

O descenso do voo, que cubría o roteiro entre Alacante e a capital galega, vese en só 27 segundos, onde están condensados os 12 minutos de manobras dos pilotos para levar a terra o avión entre a espesa néboa e a choiva habitual dun día de inverno en Santiago. 

"NON ATERRAMOS A CEGAS"

Enrique Moresco foi o piloto encargado de plasmar a aterraxe que realizaron o 8 de xaneiro.

A pesar do espectacular das imaxes, Moresco, en declaracións para Verne, comenta que esta clase de episodios son "comúns" no inverno e que sufrir climas así en Galicia é máis sinxelo que en cidades do sur, onde as pistas non están tan afeitas a esas condicións climáticas.

Ademais, a destreza dos pilotos non é incompatible co uso das mellores ferramentas e a axuda dos controladores aéreos, que fan posible que en condicións adversas os pilotos poidan aterrar con seguridade. "Non aterramos completamente a cegas", asegura Moresco, aínda que as imaxes parecen dicir o contrario.